قازاقستان مەن پاكىستان ءوزارا تاۋار اينالىمىن 1 ملرد اقش دوللارىنا دەيىن جەتكىزۋگە نيەتتى. بۇل تۋرالى ساۋدا جانە ينتەگراتسيا ءمينيسترى ارمان شاققاليەۆ يسلامابادتا وتكەن پاكىستان يسلام رەسپۋبليكاسىنىڭ كوممەرتسيا ءمينيسترى دجام كامال حانمەن ەكىجاقتى كەزدەسۋى بارىسىندا تالقىلادى، دەپ حابارلايدى «ادىرنا» ءتىلشىسى.
كەلىسسوزدەر بارىسىندا تاراپتار ءوزارا ساۋدا كولەمىن ۇلعايتۋعا باعىتتالعان جەكەلەگەن باستامالاردان جۇيەلى جۇمىسقا كوشۋگە مۇددەلى ەكەندىگىن جەتكىزدى. ارمان شاققاليەۆ تاۋار اينالىمىن ۇلعايتۋ بويىنشا ەكونوميكانىڭ ناقتى سەكتورلارىن ايقىنداۋدى، سونداي-اق وسى ماقساتقا قول جەتكىزۋگە باعىتتالعان ءىس-شارالار مەن پراكتيكالىق قادامداردى بەلگىلەۋدى ۇسىندى.
اتالعان تەتىكتى ىسكە اسىرۋ ەڭ جوعارى ساۋدا-ەكونوميكالىق الەۋەتكە يە باسىم سالالارعا، سونىڭ ىشىندە اگروونەركاسىپ كەشەنى مەن ازىق-تۇلىك ونىمدەرىنە، حيميا جانە مۇناي-حيميا ونەركاسىبىنە، مەتاللۋرگياعا، ماشينا جاساۋ مەن فارماتسەۆتيكا سالاسىنا باسىمدىقپەن نازار اۋدارۋدى كوزدەيدى.
ء«وزارا تاۋار اينالىمىن 1 ملرد اقش دوللارىنا دەيىن ۇلعايتۋ ماقساتىنا قول جەتكىزۋ ءۇشىن QazTrade جانە TDAP باستامالاردى ىسكە اسىرۋدىڭ نەگىزگى وپەراتورلارى رەتىندە ايقىندالادى. بۇل بيزنەستى سۇيەمەلدەۋ، تىكەلەي B2B-كونتاكتىلەردى ۇيىمداستىرۋ جانە بىرلەسكەن جوبالاردى جۇزەگە اسىرۋ بويىنشا جۇيەلى جۇمىستى قامتاماسىز ەتۋگە مۇمكىندىك بەرەدى»، – دەپ اتاپ ءوتتى ارمان شاققاليەۆ.
ءوز كەزەگىندە پاكىستان يسلام رەسپۋبليكاسىنىڭ ساۋدا ءمينيسترى قازاقستاندىق تاراپتىڭ باستاماسىن قولدادى.
«پاكىستان قازاقستانمەن ساۋدا قاتىناستارىن دامىتۋعا ەرەكشە ءمان بەرەدى. قازاقستان ورتالىق ازياداعى ەڭ ءىرى ەكونوميكا عانا ەمەس، سونىمەن قاتار وڭىردەگى پاكىستاننىڭ ەڭ ءىرى ەكسپورتتىق نارىعى»، – دەدى دجام كامال حان.
كەزدەسۋ قورىتىندىسى بويىنشا حاتتاماعا قول قويىلدى. وندا ورتاداعى كەلىسىمدى ىسكە اسىرۋ بويىنشا QazTrade پەن TDAP-قا ءتيىستى مىندەتتەر جۇكتەلدى.
وتكەن جىلدىڭ قورىتىندىسى بويىنشا ەكى ەل اراسىنداعى تاۋار اينالىمى ەكى ەسەگە جۋىق ۇلعايىپ، 105,6 ملن اقش دوللارىنا جەتكەن.
