ماسكەۋدە تمد-عا مۇشە مەملەكەتتەردىڭ قاۋىپسىزدىك كەڭەستەرى حاتشىلارىنىڭ XIV كەزدەسۋى ءوتتى. قازاقستان دەلەگاتسياسىن قازاقستان رەسپۋبليكاسى قاۋىپسىزدىك كەڭەسى توراعاسىنىڭ ورىنباسارى ايدا بالاەۆا باستاپ باردى.
وتىرىستا حالىقارالىق جانە وڭىرلىك قاۋىپسىزدىكتىڭ وزەكتى ماسەلەلەرى، دوستاستىق اياسىنداعى ىنتىماقتاستىقتى نىعايتۋ مۇمكىندىكتەرى قارالدى.
ايدا بالاەۆا تەرروريزم مەن ەكسترەميزمگە، كيبەرقاۋىپكە جانە حالىقارالىق ەسىرتكى بيزنەسىنە قارسى كۇرەس، سونداي-اق توتەنشە جاعدايلاردىڭ الدىن الۋ سەكىلدى بىرقاتار باسىم باعىتقا توقتالدى.
قازاقستان رەسپۋبليكاسى قاۋىپسىزدىك كەڭەسى توراعاسىنىڭ ورىنباسارى قاۋىپ-قاتەر كۇشەيگەن كەزەڭدە اتالعان باعىتتاردا بىرلەسە جۇمىس ىستەۋدىڭ ماڭىزىن اتاپ ءوتتى.
تەرروريستىك جانە وزگە دە زاڭسىز ارەكەتتەرگە جاساندى ينتەللەكتىنى پايدالانۋ قاۋپىنە، سونداي-اق اسا ماڭىزدى ينفراقۇرىلىمدى قورعاۋ مەن ەسىرتكى بيزنەسىنىڭ تسيفرلىق ارنالارىنا توسقاۋىل قويۋ ماسەلەلەرىنە ەرەكشە نازار اۋدارىلدى.
تەرروريستىك قاتەرلەردىڭ جاڭا تۇرلەرىنە جانە ەسىرتكى بيزنەسىمەن اينالىساتىن ترانسۇلتتىق قىلمىستىق توپتارعا قارسى كۇرەستە بىرلەسكەن ءىس-قيمىلدى نىعايتۋ جونىندە بىرقاتار ناقتى ۇسىنىس ايتىلدى.
پرەزيدەنت قاسىم-جومارت توقاەۆتىڭ كليماتتىق جانە تەحنوگەندىك سيپاتتاعى توتەنشە جاعدايلاردى بولجاۋ جونىندەگى وڭىرلىك ورتالىق قۇرۋ تۋرالى باستاماسىنىڭ ماڭىزى اتاپ ءوتىلدى.
ءىس-شارا اياسىندا ايدا بالاەۆا رەسەي فەدەراتسياسى قاۋىپسىزدىك كەڭەسىنىڭ حاتشىسى سەرگەي شويگۋمەن جانە بەلارۋس رەسپۋبليكاسى قاۋىپسىزدىك كەڭەسىنىڭ مەملەكەتتىك حاتشىسى الەكساندر ۆولفوۆيچپەن كەلىسسوز جۇرگىزدى. تاراپتار وڭىرلىك قاۋىپسىزدىكتىڭ وزەكتى ماسەلەلەرى جونىندە پىكىر الماسىپ، ايماقتاعى سىن-قاتەرلەر مەن قاۋىپتەردى، سونداي-اق بىرلەسە ارەكەت ەتۋ ءىس-شارالارىن تالقىلادى.
سونىمەن قاتار تمد-عا مۇشە مەملەكەتتەردىڭ قاۋىپسىزدىك كەڭەستەرى وكىلدەرى ماسكەۋدەگى بەلگىسىز جاۋىنگەر بەيىتى جانىنداعى ماڭگىلىك الاۋعا گۇل شوعىن قويۋ راسىمىنە قاتىستى.
