سولتۇستىك قازاقستان وبلىسى ايىرتاۋ اۋدانى گۋساكوۆكا اۋىلىندا 16 جاستاعى مەكتەپ وقۋشىسى سىركە سۋىن ءىشىپ قويعان، دەپ حابارلايدى «ادىرنا» ءتىلشىسى.
وبلىستىق پوليتسيا دەپارتامەنتىنىڭ مالىمەتىنشە، وقيعا 4 اقپاندا بولعان.
«قازاۋەقۇتقارۋ» سولتۇستىك اۆياتسيالىق وتريادىنىڭ تجم ۇشقىشتارى سانيتارلىق اۆياتسيا دارىگەرلەرى مەن وبلىستىق بالالار اۋرۋحاناسىنىڭ قىزمەتكەرلەرىمەن بىرىگىپ شۇعىل تاسىمالداۋدى جۇزەگە اسىرعان.
«16 جاستاعى تۇرعىن بەلگىسىز سۇيىقتىقتان ۋلانۋ بەلگىلەرىمەن مەديتسينالىق مەكەمەگە جەتكىزىلگەنى تۋرالى حابارلاما ءتۇستى. بولعان وقيعانىڭ ءمان-جايىن جان-جاقتى ءارى وبەكتيۆتى انىقتاۋعا باعىتتالعان قاجەتتى تەرگەۋ ارەكەتتەرى جۇزەگە اسىرىلىپ جاتىر»،-دەلىنگەن حابارلامادا.
قازىرگى تاڭدا وقۋشى وبلىستىق بالالار اۋرۋحاناسىندا جاتىر، جاعدايى اۋىر دەپ باعالانۋدا.
وقيعانىڭ سەبەپتەرى انىقتالۋدا.
