فوتو: قر قما ءباسپاسوز قىزمەتى.
الماتىدا سوت تاركىلەنۋگە جاتاتىن مۇلىكتى زاڭسىز يەمدەنۋ ماقساتىندا «جىلجىمايتىن مۇلىكتىڭ بىرىڭعاي مەملەكەتتىك كاداسترىنا» جالعان دەرەكتەر ەنگىزگەنى ءۇشىن ءبىر توپ ادامعا ۇكىم شىعاردى. بۇل تۋرالى قارجى مونيتورينگى اگەنتتىگىنىڭ (قما) ءباسپاسوز قىزمەتى مالىمدەدى، دەپ حابارلايدى "ادىرنا".
«الماتى قالاسىندا مەملەكەت پايداسىنا تاركىلەۋگە جاتاتىن مۇلىكتى يەمدەنۋ ماقساتىندا «جىلجىمايتىن مۇلىكتىڭ بىرىڭعاي مەملەكەتتىك كاداسترى» اقپاراتتىق جۇيەسىنە جالعان مالىمەتتەر ەنگىزۋدى ۇيىمداستىرعان ادامدار توبىنا قاتىستى سوت ۇكىمى شىقتى»، - دەلىنگەن حابارلامادا.
بۇعان دەيىن قارجىلىق مونيتورينگ اگەنتتىگى كوسپاەۆتىڭ باسشىلىعىمەن ارەكەت ەتكەن ۇيىمداسقان قىلمىستىق توپقا قاتىستى تەرگەۋدى اياقتاعان. اتالعان توپ «AV-Construction» جشس، «ستەكولنىي زاۆود» جشس، «شالقار 17» جشس، «باحار-ا» جشس جانە باسقا دا كاسىپورىنداردى رەيدەرلىك جولمەن باسىپ الۋ فاكتىلەرى بويىنشا اشكەرەلەنگەن.
سوتتىڭ شەشىمىمەن تاركىلەۋ ماقساتىندا الماتى قالاسىنداعى «نيكولسكي» بازارى اۋماعىندا ورنالاسقان «Nikolsky Investment» جشس-نە تيەسىلى جەر تەلىمى مەن مۇلكىنە تىيىم سالىنعان.
«الايدا 2025 جىلدىڭ قىركۇيەك ايىندا اسلان پۋحاەۆ، انتون سولوۆيوۆ پەن جاقسىلىق سارسەنباەۆ «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ اقپاراتتىق جۇيەسىنە جالعان مالىمەتتەر ەنگىزۋ ارقىلى اتالعان تىيىمدى زاڭسىز الىپ تاستاۋدى ۇيىمداستىرعان. كەيىننەن جالپى قۇنى ت2,2 ملرد بولاتىن مۇلىك پەن جەر تەلىمىن ءارى قاراي ساتۋ ماقساتىندا جالعان تۇلعالاردىڭ اتىنا قايتا راسىمدەلگەن»، - دەپ اتاپ ءوتتى اگەنتتىك.
سوت كىنالىلەرگە التى جىل التى اي مەرزىمگە باس بوستاندىعىنان ايىرۋ جازاسىن تاعايىندادى. ۇكىم زاڭدى كۇشىنە ەندى. مۇلىك مەملەكەت مەنشىگىنە قايتارىلدى.
