قازاقستان رەسپۋبليكاسى مادەنيەت جانە اقپارات ءمينيسترى ايدا بالاەۆانىڭ قولداۋىمەن جانە دەمەۋشىلىك قاراجات ەسەبىنەن الماتىداعى ەكى مامانداندىرىلعان مۋزىكا مەكتەپ-ينتەرناتىنا جاڭا مەكتەپ اۆتوبۋستارى ساتىپ الىندى.
كۇلاش بايسەيىتوۆا اتىنداعى دارىندى بالالارعا ارنالعان رەسپۋبليكالىق مامانداندىرىلعان مۋزىكالىق ورتا مەكتەپ-ينتەرناتىنىڭ وقۋشىلارى جاڭا وقۋ جىلىنان باستاپ «Integra Construction KZ» جشس بەرگەن 37 ورىندىق اۆتوبۋسپەن مەكتەپكە قاتىناپ ءجۇر.
ال 26 قىركۇيەكتە «Samruk-Kazyna Trust» كورپوراتيۆتىك قورى احمەت جۇبانوۆ اتىنداعى رەسپۋبليكالىق قازاق مامانداندىرىلعان مۋزىكا مەكتەپ-ينتەرناتىنا 27 ورىندىق اۆتوبۋس تابىستادى. جاڭا كولىك قالا ىشىندە وقۋشىلاردى تاسىمالداۋ ءۇشىن پايدالانىلادى.
بۇعان دەيىن بالالار ۇلكەن، اۋىر مۋزىكالىق اسپاپتارىن ارقالاپ، بىرنەشە رەت اۆتوبۋس اۋىستىرىپ مەكتەپكە جەتەتىن بولسا، ەندى ولار ساباققا قاۋىپسىز ءارى جايلى جاعدايدا بارا الادى.
قر مادەنيەت جانە اقپارات مينيسترلىگى مادەنيەت پەن ونەر سالاسىنداعى ءبىلىم بەرۋ ۇيىمدارىنىڭ وقۋ جاعدايىن جاقسارتۋ جانە ماتەريالدىق-تەحنيكالىق بازانى نىعايتۋ جۇمىستارىن جالعاستىرۋدا. بۇگىندە مەكتەپتەرگە جاڭا مۋزىكالىق اسپاپتار ساتىپ الىندى. 1–4 سىنىپ وقۋشىلارى ىستىق تاماقپەن قامتىلعان. سونداي-اق ينۆەستورلار ەسەبىنەن زاماناۋي مەكتەپ-ينتەرناتتار سالۋ ماسەلەسى قاراستىرىلىپ جاتىر.
