فوتو: Fox7austin.com
تانىمال قىتايلىق ماركەتپلەيس Temu تەحاس شتاتىندا بۇعاتتالدى. ەندى بۇل قوسىمشانى مەملەكەتتىك قىزمەتكەرلەرگە پايدالانۋعا جانە شتاتتىڭ مەنشىگىندەگى قۇرىلعىلاردا اشۋعا تىيىم سالىندى.
تەحاس گۋبەرناتورى گرەگ ەببوت مەملەكەتتىك قىزمەتكەرلەرگە قىتايلىق ماركەتپلەيستەر — Temu, PinDuoDuo جانە Shein-ءدى پايدالانۋعا تىيىم سالۋ تۋرالى شەشىم قابىلدادى. ونلاين-دۇكەندەرمەن قاتار، TP-Link, Xiaomi, CATLجانە باسقا دا قىتايلىق ەلەكترونيكا برەندتەرىن قولدانۋعا شەكتەۋ قويىلدى. سونداي-اق قىتايلىق جاساندى ينتەللەكت سەرۆيستەرى مەن بوتتار دا بۇعاتتاۋعا ىلىكتى.
ەببوت بۇل شەكتەۋلەردىڭ سەبەبىن تەحاستىقتاردىڭ جەكە دەرەكتەرىنىڭ قاۋىپسىزدىگىمەن ءتۇسىندىردى. شتات بيلىگى مەملەكەتتىك قىزمەتكەرلەر مەن قاراپايىم تۇرعىنداردىڭ دەرەكتەرىنە شەتەلدىك مەملەكەتتەردىڭ قول جەتكىزۋىن شەكتەۋ باعىتىندا بەلسەندى جۇمىس جۇرگىزىپ جاتىر.
«پايدالانۋشىلاردىڭ جەكە دەرەكتەرى جاساندى ينتەللەكت جانە باسقا دا قوسىمشالار مەن جابدىقتار ارقىلى جينالىپ، ولاردى پايدالانۋ، مانيپۋلياتسيا جاساۋ ارقىلى پايدالانۋشىلاردىڭ قۇقىقتارى بۇزىلادى»، – دەدى گۋبەرناتور.
قازىرگى تاڭدا اقش-تا Temu-عا قارسى بىرنەشە سوت ءىسى قارالۋدا. ماركەتپلەيس، سونىڭ ىشىندە، جەكە دەرەكتەردى زاڭسىز جينادى جانە پايدالاندى دەپ ايىپتالىپ وتىر.
اريزونا شتاتىنىڭ باس پروكۋرورى كريس مەيەس Temu قوسىمشاسى جەكە دەرەكتەردىڭ «شوك تۋدىراتىن كولەمىن»، ونىڭ ىشىندە گەولوكاتسيانى جانە سمارتفوندا ورناتىلعان باسقا قوسىمشالار تۋرالى اقپاراتتى جينايتىنىن مالىمدەدى.
بۇعان دەيىن باق Temu قوسىمشاسىنىڭ قازاقستاندىقتار ءۇشىن دە قاۋىپتى بولۋى مۇمكىن ەكەنىن جازعان. باعدارلاما شپيوندىق سيپاتتا جۇمىس ىستەپ، جەكە دەرەكتەردىڭ ۇلكەن كولەمىن جيناپ، ولاردى بەيجىڭگە جىبەرۋى ىقتيمال ەكەنى ايتىلعان. سونداي-اق Temu ءوزىنىڭ باس كومپانياسى ارقىلى People’s Data كومپانياسىمەن تىكەلەي بايلانىستى ەكەنى حابارلانعان. ال بۇل كومپانيا ءىس جۇزىندە قىتاي كوممۋنيستىك پارتياسى مەن ورتالىق كوميتەتتىڭ قۇرىلىمدىق بولىمشەسى سانالادى.
قازاقستاندىق باق-تا Temu قوسىمشاسىن ورناتۋ كەزىندە شامادان تىس كوپ رۇقسات سۇرايتىنى دا ايتىلعان. اتاپ ايتقاندا، كامەراعا، ميكروفونعا، بايلانىستار تىزىمىنە، گەولوكاتسياعا، IP-مەكەنجايعا، باسقا پايدالانۋشىلارمەن ءوزارا ارەكەتتەسۋگە جانە وزگە دە دەرەكتەرگە قول جەتكىزۋدى تالاپ ەتەدى. بۇل رۇقساتتاردىڭ كوبى ادەتتەگى ونلاين ساۋدا ءۇشىن قاجەت ەمەس.
ساراپشىلار Temu-دىڭ قۇپيالىلىق ساياساتى جەتكىلىكتى دەڭگەيدە اشىق ەمەس ەكەنىن جانە دەرەكتەردىڭ ناقتى قالاي پايدالانىلاتىنىن ەگجەي-تەگجەيلى تۇسىندىرمەيتىنىن اتاپ وتۋدە. وسىعان بايلانىستى پلاتفورما پايدالانۋشىلاردىڭ دەرەكتەرىن ءۇشىنشى تۇلعالارعا ساتۋ نەمەسە بەرۋى مۇمكىن دەگەن كۇدىك بار.
