اتوم ەنەرگياسى جونىندەگى اگەنتتىك توراعاسى الماسادام ساتقاليەۆ قىتاي مەردىگەرلەرىنىڭ ەلىمىزدە ەكىنشى اتوم ەلەكتر ستانتسياسىن سالۋ مۇمكىندىگىن زەردەلەپ جاتقانىن ايتتى، دەپ حابارلايدى «ادىرنا» ءتىلشىسى قازاقپاراتقا سىلتەمە جاساپ.
«قىتايلىق مەردىگەرلەردىڭ اتوم ستانتسياسىن سالۋعا قاتىسۋ مۇمكىندىگىن زەرتتەۋ جونىندە ءتيىستى مەموراندۋمعا قول قويدىق. ولار مۇمكىندىكتەردى زەرتتەپ جاتىر. بولجام بويىنشا، جاعداي "روساتوممەن" بولعان ستسەناريگە ۇقساس بولادى. ياعني، قىتايلىق ارىپتەستەرىمىز جوبالاۋ جانە ىزدەستىرۋ جۇمىستارىنا الدىن الا قىزىعۋشىلىق تانىتىپ وتىر. بۇل جاعدايدا الماتى جانە جامبىل وبلىستارىنداعى ۋچاسكەلەر زەرتتەلەتىن بولادى. قازىر ءبىز اكىمدىكتەرگە وسى الاڭداردى انىقتاپ، رۇقسات بەرۋدى سۇرادىق»،—دەدى ول.
ەسكە سالايىق، قازان ايىندا ساتقاليەۆ الماتى وبلىسىندا تاعى ءبىر اەس سالىنۋى مۇمكىن ەكەنىن ايتقان ەدى. ەلدەگى العاشقى اەس-تى سالۋ جۇمىسى رەسەيدىڭ «روساتوم» كومپانياسىنا بەرىلگەن بولاتىن.
