الەۋمەتتىك جەلىلەردە سوڭعى كۇندەرى «مەملەكەتتىك ءتىل ءۇشىن ولۋگە دە، سوتتالۋعا دا بولادى» دەگەن سوزدەردى اقىن مۇحتار شاحانوۆ ايتقان دەگەن اقپارات كەڭىنەن تارادى، دەپ حابارلايدى “ادىرنا” ۇلتتىق پورتالى.
وسى تۇستا اقىننىڭ كەلىنى جەلىدەگى پاراقشاسىندا مالىمدەمە جاسادى.
"مەن جاڭاگۇل مۇراتقىزى، مۇحتار شاحانوۆتىڭ كەلىنى رەتىندە،الەۋمەتتىك جەلىدە اتا جاريالانعان ۆيدەوعا بايلانىستى اشىق مالىمدەمە جاسايمىن! اتانىڭ قازىرگى جاعدايى وتە اۋىر، ايتقانىن ءبىر ساتتەن كەيىن ۇمىتىپ قالاتىن ناۋقاس كۇيدە. جاقىندا عانا ەكىنشى ۇلىنان ايىرىلعان ادامنىڭ پسيحوەموتسيونالدىق جاعدايىنىڭ قانشالىقتى اۋىر ەكەنىن بىرەۋ تۇسىنسە،بىرەۋ تۇسىنبەيدى. قازىرگى تاڭدا اتا قوعامدا بولىپ جاتقان جاعدايلاردان مۇلدەم بەيحابار، وسىنى تۇسىنىڭىزدەر! تىنىشتىق بەرىڭىزدەر! ۇلتىنا ولشەۋسىز ەڭبەگى سىڭگەن، انا تىلىنە ءومىرىن ارناعان اتامىزدى ءبىر ۆيدەوعا بولا قارعاپ-سىلەۋدىڭ، قارالاۋدىڭ ەشقانداي نەگىزى جوق. مۇحتار شاحانوۆ ءوز ۇلتىنىڭ الدىندا ادال پەرزەنتى بولىپ ماڭگى تاريحتا قالاتىن تۇلعا", - دەپ جازدى شاحانوۆتىڭ كەلىنى جاڭاگۇل ومىربەكوۆا.
