يراندا ايەلدەر قۇقىعىن قورعاۋمەن تانىلعان بەلسەندى، نوبەل سىيلىعىنىڭ لاۋرەاتى نارگيز موحاممادي 8 اقپاندا 7 جىل 6 ايعا باس بوستاندىعىنان ايىرىلدى. بۇل تۋرالى Reuters جازدى، دەپ حابارلايدى "ادىرنا".
نارگيز قورىنىڭ مالىمەتىنشە، 53 جاستاعى قۇقىق قورعاۋشى سوت ۇكىمى شىققانعا دەيىن ءبىر اپتا بويى اشتىق جاريالاعان. ونىڭ ادۆوكاتى مۋستافا نيلي سوت شەشىمى سەنبى كۇنى قابىلدانعانىن ايتقان. ال يراننىڭ سىرتقى ىستەر مينيسترلىگى بۇل جاعدايعا قاتىستى رەسمي تۇسىنىكتەمە بەرمەدى.
رەپرەسسياعا قارسى كۇرەسىمەن بەلگىلى موحاممادي بىلتىر 12 جەلتوقساندا ادۆوكات حوسروۋ اليكورديدىڭ ولىمىنە بايلانىستى كۇمان كەلتىرىپ، نارازىلىق بىلدىرگەننەن كەيىن قاماۋعا الىنعان. قازىر ول مەشحەد قالاسىنداعى ۋاقىتشا ۇستاۋ يزولياتورىندا وتىر. قور وكىلدەرىنىڭ ايتۋىنشا، بىرنەشە اپتا وقشاۋلانعاننان كەيىن عانا بەلسەندى ادۆوكاتىمەن قىسقا تەلەفون ارقىلى سويلەسۋگە مۇمكىندىك العان.
"بىرنەشە اپتا بويى وقشاۋلانىپ، ونىمەن حابار الۋ تولىعىمەن ۇزىلگەننەن كەيىن، ول ءوزىنىڭ ادۆوكاتىمەن تەلەفون ارقىلى قىسقا عانا سويلەسىپ، حال-جاعدايىن باياندادى", - دەلىنگەن قوردىڭ حابارلاماسىندا.
سوت ۇكىمىنە سايكەس، ول زاڭسىز جيىندار ۇيىمداستىردى دەگەن ايىپپەن 6 جىلعا سوتتالدى. بۇعان قوسا، ەكى جىلعا حۋسف قالاسىنا جەر اۋدارىلىپ، 1,5 جىل بويى شەتەلگە شىعۋىنا تىيىم سالىندى.
ايتا كەتەيىك، نارگيز موحاممادي 2023 جىلى تۇرمەدە وتىرعان كەزىندە يرانداعى ايەلدەر قۇقىعىن قورعاۋ جانە ءولىم جازاسىن جويۋ جولىنداعى كۇرەسى ءۇشىن نوبەل سىيلىعىنا يە بولعان.
