وقۋ-اعارتۋ ءمينيسترى جۇلدىز سۇلەيمەنوۆا اتىراۋ وبلىسىندا وقۋشىلار اراسىنداعى بۋللينگ فاكتىسىنە قاتىستى پىكىر ءبىلدىرىپ، بۇل ماسەلە جۇيەلى شەشىمدى قاجەت ەتەتىنىن ايتتى، دەپ حابارلايدى "ادىرنا" ۇلتتىق پورتالى.
ءمينيستردىڭ ايتۋىنشا، بالالار اراسىنداعى بۋللينگ، توبەلەس جانە الىمجەتتىك سياقتى جاعدايلارعا باسقارۋشىلىق ءارى قۇقىقتىق تۇرعىدا باعا بەرىلۋى ءتيىس. الايدا مۇنداي وقيعالار بولعان سايىن مەكتەپ ديرەكتورىن قىزمەتتەن بوساتۋ دۇرىس شەشىم ەمەس ەكەنىن اتاپ ءوتتى.
«وقۋ جىلىنىڭ ورتاسىندا وسىنداي جاعدايلار ورىن الىپ، ءبىز ديرەكتورلاردى جۇمىستان بوساتا بەرەتىن بولساق، وندا مەكتەپ ديرەكتورلارى تۇراقتامايدى. بۇل – قيسىنسىز. مۇنداي ۇلكەن ماسەلەگە جاۋاپكەرشىلىكتى تەك ديرەكتوردان عانا ەمەس، جالپى قوعامنان تالاپ ەتۋىمىز كەرەك. ونىڭ ىشىندە مەكتەپ اكىمشىلىگى، اتا-انالار، پەداگوگتار، ءبىلىم بەرۋ باسقارمالارى جانە ۋاكىلەتتى ورگاندار دا جاۋاپتى بولۋى ءتيىس»، – دەدى جۇلدىز سۇلەيمەنوۆا.
مينيستر قازىرگى تاڭدا وقۋشىلار مەن جاسوسپىرىمدەر اراسىنداعى قۇقىق بۇزۋشىلىقتى ازايتۋ جانە بۋللينگتىڭ الدىن الۋ باعىتىندا كەشەندى جۇمىستار جۇرگىزىلىپ جاتقانىن ايتتى. ونىڭ سوزىنشە، وتكەن جىلى جامبىل جانە قىزىلوردا وبلىستارىندا كۇشتىك ورگاندار مەن پروكۋراتۋرا وكىلدەرىنىڭ قاتىسۋىمەن كەڭەستەر وتكىزىلگەن. وسىنداي كەزدەسۋ جۋىردا تۇركىستان وبلىسىندا دا ۇيىمداستىرىلعان.
ايتا كەتەيىك، بۇعان دەيىن قۇلسارى قالاسىنداعى ا.س. پۋشكين اتىنداعى №6 مەكتەپتە 10-سىنىپ وقۋشىسى مەكتەپ ىشىندە بالتامەن وزگە وقۋشىلاردى قۋىپ، قاۋىپ توندىرگەن.
