اۋعانستاندا «تاليبان» قوزعالىسىنىڭ بيلىگى جاڭا قىلمىستىق كودەكستى رەسمي تۇردە قابىلدادى. بۇل قۇجات قۇقىق قورعاۋ ۇيىمدارى مەن حالىقارالىق قاۋىمداستىق تاراپىنان قاتتى سىنعا ۇشىرادى، دەپ حابارلايدى «ادىرنا» ءتىلشىسى The Sunday Guardian باسىلىمىنا سىلتەمە جاساپ.
ساراپشىلاردىڭ ايتۋىنشا، كودەكستىڭ كەيبىر بابى تۇرمىستىق زورلىق-زومبىلىقتى ءىس جۇزىندە زاڭداستىرىپ، ايەلدەر مەن بالالاردىڭ نەگىزگى قۇقىقتارىن ەداۋىر شەكتەيدى.
«قۇقىق قورعاۋشىلار جازالاردىڭ تەڭگەرىمسىزدىگىنە دە نازار اۋداردى. ايەل ادامعا دەنە جاراقاتىن كەلتىرگەنى ءۇشىن بەرىلەتىن جازا كەيبىر زورلىققا قاتىسى جوق قۇقىقبۇزۋشىلىقتارعا قاراعاندا الدەقايدا جەڭىل بولۋى مۇمكىن»،-دەلىنگەن حابارلامادا.
ەرەكشە نارازىلىق تۋعىزعانى — ەرلى-زايىپتىلار اراسىنداعى زورلىق ماسەلەسىنە ارنالعان 32-باپ. وندا «ادەپسىز كۇش قولدانۋ» ارقىلى ايەلىن ۇرىپ-سوققان ەر ادام (ياعني «كورىنەتىن جارالار نەمەسە كوگەرۋلەر» بولعان جاعدايدا) نەبارى 15 تاۋلىككە عانا تۇرمەگە قامالۋى مۇمكىن. بىراق بۇل جازا ايەل سوتتا زورلىق فاكتىسىن دالەلدەي العان جاعدايدا عانا قولدانىلادى. سونىمەن قاتار 34-باپتا كۇيەۋىنىڭ رۇقساتىنسىز توركىنىنە بارعان ايەلگە جانە ونى قايتا جىبەرمەگەن تۋىستارىنا ءۇش ايعا دەيىن تۇرمە جازاسى كوزدەلگەن.
«كودەكس جەكە ادامنىڭ قۇقىقتارىنان گورى الەۋمەتتىك باقىلاۋدى، پاتريارحاتتى جانە يدەولوگيالىق قىسىمدى جوعارى قويادى. ول ايەلدەرگە كوبىرەك اسەر ەتىپ، ولاردىڭ ءجۇرىپ-تۇرۋىن، قارىم-قاتىناسىن، وتباسىلىق شەشىمدەرىن جانە جەكە سەنىمدەرىن قاتاڭ رەتتەيدى، ال زورلىق-زومبىلىقتان قورعانۋ مۇمكىندىگىن شەكتەۋلى دەڭگەيدە عانا ۇسىنادى»،-دەيدى ماماندار.
سونىمەن قاتار دىننەن «بەزگەندەرگە» قاتىستى دا قاتاڭ شارالار قاراستىرىلعان. 58-باپقا سايكەس، يسلامنان باس تارتقان ايەلدەر ءومىر بويىنا تۇرمەگە قامالىپ، تاۋبەسىنە كەلگەنگە دەيىن ءار ءۇش كۇن سايىن 10 دۇرە سوعۋعا ۇكىم ەتىلۋى مۇمكىن.
ال ەر ادامدارعا قاتىستى باسقا ءتارتىپ قولدانىلادى. حانافي مازحابى بويىنشا، ولارعا تاۋبەگە كەلۋ ءۇشىن ءۇش كۇنگە دەيىن ۋاقىت بەرىلەدى، سودان كەيىن ءولىم جازاسىنا كەسىلۋى مۇمكىن. قۇقىق قورعاۋشىلار مۇنى زاڭ قولدانۋداعى گەندەرلىك كەمسىتۋشىلىكتىڭ ايقىن مىسالى دەپ سانايدى.
