Auǧanstanda «Taliban» qozǧalysynyŋ bilıgı jaŋa Qylmystyq kodekstı resmi türde qabyldady. Būl qūjat qūqyq qorǧau ūiymdary men halyqaralyq qauymdastyq tarapynan qatty synǧa ūşyrady, dep habarlaidy «Adyrna» tılşısı The Sunday Guardian basylymyna sılteme jasap.
Sarapşylardyŋ aituynşa, kodekstıŋ keibır baby tūrmystyq zorlyq-zombylyqty ıs jüzınde zaŋdastyryp, äielder men balalardyŋ negızgı qūqyqtaryn edäuır şekteidı.
«Qūqyq qorǧauşylar jazalardyŋ teŋgerımsızdıgıne de nazar audardy. Äiel adamǧa dene jaraqatyn keltırgenı üşın berıletın jaza keibır zorlyqqa qatysy joq qūqyqbūzuşylyqtarǧa qaraǧanda äldeqaida jeŋıl boluy mümkın»,-delıngen habarlamada.
Erekşe narazylyq tuǧyzǧany — erlı-zaiyptylar arasyndaǧy zorlyq mäselesıne arnalǧan 32-bap. Onda «ädepsız küş qoldanu» arqyly äielın ūryp-soqqan er adam (iaǧni «körınetın jaralar nemese kögeruler» bolǧan jaǧdaida) nebärı 15 täulıkke ǧana türmege qamaluy mümkın. Bıraq būl jaza äiel sotta zorlyq faktısın däleldei alǧan jaǧdaida ǧana qoldanylady. Sonymen qatar 34-bapta küieuınıŋ rūqsatynsyz törkınıne barǧan äielge jäne ony qaita jıbermegen tuystaryna üş aiǧa deiın türme jazasy közdelgen.
«Kodeks jeke adamnyŋ qūqyqtarynan görı äleumettık baqylaudy, patriarhatty jäne ideologiialyq qysymdy joǧary qoiady. Ol äielderge köbırek äser etıp, olardyŋ jürıp-tūruyn, qarym-qatynasyn, otbasylyq şeşımderın jäne jeke senımderın qataŋ retteidı, al zorlyq-zombylyqtan qorǧanu mümkındıgın şekteulı deŋgeide ǧana ūsynady»,-deidı mamandar.
Sonymen qatar dınnen «bezgenderge» qatysty da qataŋ şaralar qarastyrylǧan. 58-bapqa säikes, islamnan bas tartqan äielder ömır boiyna türmege qamalyp, täubesıne kelgenge deiın är üş kün saiyn 10 düre soǧuǧa ükım etıluı mümkın.
Al er adamdarǧa qatysty basqa tärtıp qoldanylady. Hanafi mazhaby boiynşa, olarǧa täubege kelu üşın üş künge deiın uaqyt berıledı, sodan keiın ölım jazasyna kesıluı mümkın. Qūqyq qorǧauşylar mūny zaŋ qoldanudaǧy genderlık kemsıtuşılıktıŋ aiqyn mysaly dep sanaidy.
