بۇگىن، 11 اقپاندا مەملەكەت قايراتكەرى، وپپوزيتسيالىق ساياساتكەر التىنبەك سارسەنبايۇلىنىڭ قازا تاپقانىنا 20 جىل تولىپ وتىر، دەپ حابارلايدى «ادىرنا» ءتىلشىسى.
ول 2006 جىلدىڭ 11 اقپانىندا كومەكشىسى باۋىرجان بايبوسىن جانە جۇرگىزۋشىسى ۆاسيلي جۋراۆلەۆپەن بىرگە ۇرلانعان ەدى. كەيىن ولاردىڭ دەنەلەرى 13 اقپاندا الماتى ماڭىنداعى تاۋ باۋرايىنان تابىلعان. ۇشەۋىنىڭ دە ارت جاعىنان جانە باستارىنا وق اتىلعان.
كەيىننەن قىلمىسقا ۇلتتىق قاۋىپسىزدىك كوميتەتىنىڭ «ارىستان» ارنايى توبىنىڭ وفيتسەرلەرى قاتىسقانى بەلگىلى بولدى. سوت ءۇش ادامدى ءولتىردى دەپ تانىلعان بۇرىنعى پوليتسيا قىزمەتكەرىنە ءومىر بويىنا باس بوستاندىعىنان ايىرۋ جازاسىن تاعايىندادى. بۇل ءىس بويىنشا سوت پروتسەسى ەكى رەت ءوتىپ، ءار جولى بۇرىنعى لاۋازىمدى تۇلعالار كىسى ولتىرۋگە تاپسىرىس بەرۋشىلەر رەتىندە تانىلىپ، ءارتۇرلى ۇكىم شىعارىلدى. مارقۇمنىڭ جاقىندارى مەن سەرىكتەستەرى ونى «ساياسي قاستاندىقتىڭ قۇربانى» دەپ ەسەپتەيدى. ولاردىڭ پىكىرىنشە، قىلمىستىڭ بارلىق ءمان-جايى ءالى كۇنگە دەيىن تولىق اشىلعانماعان.
ايتا كەتەيىك، التىنبەك سارسەنبايۇلى
قازاقستاننىڭ رەسەي فەدەراتسياسىنداعى توتەنشە جانە وكىلەتتى ەلشىسى (2002-2003), قاۋىپسىزدىك كەڭەسىنىڭ حاتشىسى (2001), قازاقستاننىڭ اقپارات سالاسىنا جاۋاپتى ءمينيسترى (1993-2001, 2004), «اق جول» جانە كەيىن «ناعىز اق جول» ساياسي پارتياسىنىڭ تەڭ توراعاسى (2003-2006) قىزمەتتەرىن اتقارعان بولاتىن.
