ۋكراينانىڭ قازاقستانداعى ەلشىسى ۆيكتور مايكو گەوساياسات پەن قازاقستان-ۋكراينا اراسىنداعى ەكىجاقتى قاتىناستارعا قاتىستى بىرقاتار ماڭىزدى مالىمدەمە جاسادى، دەپ حابارلايدى «ادىرنا» ءتىلشىسى.
ول The Times of Central Asia باسىلىمىنا بەرگەن سۇحباتىندا 2026 جىلدىڭ شەشۋشى كەزەڭگە اينالاتىنىنا سەنىم ءبىلدىردى.
«سوعىس بيىل اياقتالادى دەپ ويلايمىن. مەن بۇعان شىن جۇرەكتەن سەنەمىن»، – دەدى مايكو.
ايتۋىنشا، كرەملدىڭ رەسۋرستارى مەن ىشكى مۇمكىندىكتەرى تاۋسىلىپ كەلەدى، ال باتىس ۋكرايناعا تۇراقتى تۇردە قولداۋ كورسەتۋدە. سونىمەن قاتار ول ۋكراينا ءوز اۋماقتارىنان ءوز ەركىمەن باس تارتپايتىنىن اتاپ ءوتتى، ويتكەنى ول جەرلەردە ۋكراين ازاماتتارى مەن ماڭىزدى وندىرىستىك نىساندار ورنالاسقان.
مايكو قازاقستاندىق جۇك تاسىمالىنىڭ قاۋىپسىزدىگىنە دە ەرەكشە توقتالدى. نوۆوروسسيسك ماڭىنداعى تانكەرلەرمەن بولعان سوڭعى وقيعالارعا بايلانىستى ەلشى قازاقستان ۋكراين كۇشتەرىنىڭ نىساناسى ەمەس ەكەنىن جانە ەشقاشان بولمايتىنىن ايتتى.
«ۋكراينا ەشقاشان قازاقستان ەكونوميكاسىنا نەمەسە ينفراقۇرىلىمىنا شابۋىل جاساعان جوق. ءبىزدىڭ سوققىلارىمىز تەك رەسەيدىڭ اسكەري وبەكتىلەرىنە باعىتتالعان. قازاقستان – ماڭىزدى سەرىكتەسىمىز»،– دەدى ديپلومات.
ول سونداي-اق قازاقستاندىق مۇناي تاسىمالداعان تانكەرلەرگە قاتىستى وقيعالار ارانداتۋشىلىق نەمەسە جاقىن قاشىقتىقتان جاسالعان شابۋىل بولۋى مۇمكىن ەكەنىن، ونىڭ ۋكراينا تاراپىنان جاسالماعانىن ايتتى.
ودان بولەك، ۆيكتور مايكو بۇگىنگى تاڭدا قازاقستان ايماقتاعى باستى كوشباسشىلاردىڭ بىرىنە اينالىپ وتىرعانىن، ال IT, اۋىل شارۋاشىلىعى جانە ماشينا جاساۋ سالالارىنداعى ىنتىماقتاستىق ەكى ەل ەكونوميكاسىنا جاڭا جاھاندىق جاعدايلارعا بەيىمدەلۋگە كومەكتەسەتىنىن ايتتى.
