الماتىدا 30 جەلتوقساننان باستاپ قاتتى جانە سۇيىق وتىندى پايدالانۋعا تىيىم ەنگىزىلەدى. بۇل تۋرالى قالالىق ەكولوگيا جانە قورشاعان ورتا باسقارماسى ايتتى، دەپ حابارلايدى «ادىرنا» ءتىلشىسى.
اتالعان تالاپتار قالانىڭ گازداندىرىلعان اۋماقتارىنا قاتىستى قاعيدالاردىڭ 52-تارماعىندا كوزدەلگەن. قۇجاتقا سايكەس، گازعا قوسىلۋ مۇمكىندىگى بار جەكە تۇرعىن ۇيلەردە، مونشالاردا جانە كوپپاتەرلى ۇيلەردى جىلىتاتىن جەكەلەگەن قازاندىقتاردا قاتتى جانە سۇيىق وتىندى پايدالانۋعا تىيىم سالىنادى. توتەنشە جاعداي كەزىندە جىلۋ جانە ەنەرگيامەن جابدىقتاۋدىڭ رەزەرۆتىك كوزدەرىن پايدالانۋعا رۇقسات ەتىلەدى.
«بۇل تالاپتار جىلىتۋ قازاندىقتارىن پايدالاناتىن شارۋاشىلىق سۋبەكتىلەرىنە دە قولدانىلادى. شىعارىندىلار كوزدەرى لاستاۋشى زاتتاردى تازارتۋ قوندىرعىلارىمەن مىندەتتى تۇردە جابدىقتالۋى ءتيىس. سونىمەن قاتار، ارنايى تەحنيكا، بەنزين جانە ديزەل گەنەراتورلارى دا ەكولوگيالىق تالاپتارعا سايكەس بولۋى قاجەت.
وسىلايشا، شەكتەۋ تەك مونشاعا عانا ەمەس، گازداندىرىلعان اۋماقتاردا ورنالاسقان جەكە تۇرعىن ۇيلەرگە دە قاتىستى»،- دەلىنگەن حابارلامادا.
ايتا كەتەيىك، قازىرگى تاڭدا الماتىداعى جەكە سەكتوردىڭ گازداندىرۋ دەڭگەيى شامامەن 99,6%. بۇل ءۇي يەلەرىنىڭ باسىم بولىگىندە تابيعي گازعا قوسىلۋعا تەحنيكالىق مۇمكىندىك بار ەكەنىن كورسەتەدى.
