قازاقستاندىق مانەرلەپ سىرعاناۋشى وزىنە قاتىستى اقپاراتقا جاۋاپ بەردى، دەپ حابارلايدى “ادىرنا” ۇلتتىق پورتالى Stan.kz-كە سىلتەپ.
سپورتشى ميحايل شايدوروۆتى قىسقى وليمپيادا ويىندارىندا التىن مەدال جەڭىپ العاننان كەيىن “شىعۋ تەگى – رەسەيلىك” دەگەن مالىمەت تارادى.
2024 جىلدىڭ سوڭىندا گران-پري كەزەڭىندەگى ءساتتى ونەرىنەن كەيىن كەيبىر شەتەلدىك باسىلىمدار سپورتشىنى رەسەيلىك دەپ اتاعان. سونداي-اق ميلاندا وتكەن وليمپيادادا التىن مەدال يەلەنگەننەن كەيىن دە وسىنداي مالىمەتتەر تاراعان.
وتكەن جىلدىڭ قاڭتار ايىندا Sport+ ارناسىنداعى “تىكەلەي اڭگىمە” باعدارلاماسىندا شايدوروۆ بۇل پىكىرلەردى وزىنە جاسالعان قۇرمەتسىزدىك دەپ باعالادى.
“مەن الماتىدا دۇنيەگە كەلدىم. سول جەردە ءوستىم جانە قازىر دە تۇرىپ جاتىرمىن. ۋاقىتىمنىڭ كوپ بولىگىن قازاقستاندا وتكىزەمىن. ماعان جەتەكشىلىك ەتىپ جۇرگەن باپكەرىم الەكسەي ۋرمانوۆپەن جۇمىس ىستەۋ – ۇلكەن مۇمكىندىك. بىراق مانەرلەپ سىرعاناۋدى الماتىداعى “رامستور” ساۋدا ورتالىعىنىڭ مۇز ايدىنىندا باستادىم. بۇل – قازاقستانداعى العاشقى مۇز ايدىندارىنىڭ ءبىرى. سول جەردە كوپتەگەن سپورتشى، سونىڭ ىشىندە دەنيس تەن دە جاتتىققان. رەسەيدە وقۋ-جاتتىعۋ جيىندارىنا قاتىسقانىم راس، الايدا مەنى رەسەيلىك سپورتشى دەپ اتاۋ – دۇرىس ەمەس”، - دەدى ول.
