قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتى مەن اباي اتىنداعى قازاق ۇلتتىق پەداگوگيكالىق ۋنيۆەرسيتەتى جوشى ۇلىسىنىڭ تاريحىنا قاتىستى كونفەرەنتسيا وتكىزدى، دەپ حابارلايدى "ادىرنا" ۇلتتىق پورتالى.
ەكى جوو بىرلەسە ۇيىمداستىرعان «رەسمي جازبالار نەگىزىندە جوشى ۇلىسىنىڭ مەملەكەتتىك بيلىگى جانە تاريحي جادى» اتتى حالىقارالىق عىلىمي كونفەرەنتسيا جانە كىتاپ تانىستىرىلىمى الماتى قالاسىندا ءوتتى. ءىس-شارا اكادەميالىق قاۋىمداستىق تاراپىنان جوعارى قىزىعۋشىلىق تۋدىرىپ، كەڭ اۋقىمدى قاتىسۋمەن ەرەكشەلەندى.
كونفەرەنتسيانىڭ اشىلۋىندا ەۋرازيا عىلىمي-زەرتتەۋ ينستيتۋتى ديرەكتورى، دوكتور، دوتسەنت سۋات بەيلۋر, تۇركيا رەسپۋبليكاسىنىڭ قازاقستانداعى الماتى قالاسىنداعى ءبىلىم اتتاشەسى شۇكىر كوسە, قازاقستان رەسپۋبليكاسىنىڭ ۇلتتىق كىتاپحاناسى ديرەكتورى عازيزا قۇدايبەرگەنوۆا جانە ءال-فارابي اتىنداعى قازاق ۇلتتىق ۋنيۆەرسيتەتى پروفەسسورى، تاريح عىلىمدارىنىڭ دوكتورى بەرەكەت كارىباەۆ قۇتتىقتاۋ ءسوز سويلەدى.
عىلىمي جيىنعا شەتەلدىك جانە وتاندىق زەرتتەۋشىلەر قاتىستى. اتاپ ايتقاندا، مارمارا ۋنيۆەرسيتەتى پروفەسسورى ءىلياس كەمالوعلى, اباي اتىنداعى قازۇپۋ پروفەسسورى نۇرلان كەنجەاحمەت, م.ا. ۋسمانوۆ اتىنداعى زەرتتەۋ ورتالىعى وكىلى، عىلىم دوكتورى يلنۋر ميرگالەەۆ, اباي اتىنداعى قازۇپۋ پروفەسسورى فاكيا شامشيدەنوۆا, يىلدىز تەحنيكالىق ۋنيۆەرسيتەتى پروفەسسورى مەلەك وزيەتگين, ءال-فارابي اتىنداعى قازۇۋ وكىلى قايرات قايپوللا جانە ەۋرازيا عىلىمي-زەرتتەۋ ينستيتۋتىنىڭ دوتسەنتى بەكارىس نۇريمان بايانداما جاسادى.
باياندامالاردا جوشى ۇلىسى مەملەكەتىنىڭ سىرتقى ساياساتى، يارلىقتار جۇيەسى، اكىمشىلىك-قۇقىقتىق قۇرىلىمى، ديپلوماتيالىق جازبالاردىڭ تىلدىك ەرەكشەلىكتەرى، سونداي-اق التىن وردا كەزەڭىنەن قازاق حاندىعىنا دەيىنگى قۇقىقتىق ساباقتاستىق ماسەلەلەرى جان-جاقتى تالقىلاندى.
ءىس-شارا اياسىندا جوشى ۇلىسىنا قاتىستى رەسمي جازبالار اتتى كىتاپتىڭ قازاق تىلىندەگى اۋدارماسىنىڭ تانىستىرىلىمى ءوتتى. ساراپشىلار بۇل ەڭبەكتى ورتاعاسىرلىق مەملەكەتتىك باسقارۋ ءداستۇرىن، قۇقىقتىق مادەنيەتتى جانە تاريحي ساباقتاستىقتى زەرتتەۋدە ماڭىزدى دەرەككوز رەتىندە باعالادى.
