وتاندىق ءوندىرىستىڭ بىرقاتار نەگىزگى تاۋارىنىڭ تاپشىلىعى – ينفلياتسيالىق قىسىمنىڭ باستى سەبەپتەرىنىڭ ءبىرى. بۇل تۋرالى پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين ايتتى، دەپ حابارلايدى «ادىرنا» ءتىلشىسى.
ول بازالىق تاۋارلار تاپشىلىعىن جويۋعا باسا نازار اۋدارىلاتىنىن مالىمدەدى. ايتۋىنشا، قازىرگى ۋاقىتتا ازىق-تۇلىك سەكتورىندا 12 باعىت جانە ازىق-تۇلىككە جاتپايتىن سەكتوردا 24 باعىت ايقىندالعان. 2030 جىلعا دەيىن «بايتەرەك» حولدينگىنىڭ ەنشىلەس ۇيىمدارى ارقىلى شامامەن $100-120 ملرد سوماعا ونەركاسىپتىك جوبالاردى قارجىلاندىرۋ جوسپارلانۋدا.
«ىشكى نارىقتى وتاندىق تاۋارلارمەن جۇيەلى تۇردە قامتاماسىز ەتۋ ءۇشىن «ينۆەستيتسياعا تاپسىرىس» باعدارلاماسى جۇزەگە اسىرىلۋدا. بۇگىندە ينفلياتسيالىق قىسىمنىڭ نەگىزگى سەبەپتەرىنىڭ ءبىرى – تۇتىنۋ جانە تۇتىنۋ ەمەس سەگمەنتتەردە وتاندىق وندىرىستەگى بىرقاتار بازالىق تاۋارلاردىڭ تاپشىلىعى. ءبىزدىڭ ماقسات – ىشكى نارىقتى وتاندىق ءوندىرىس تاۋارلارىمەن قامتاماسىز ەتۋ جانە يمپورتقا تاۋەلدىلىكتى تومەندەتۋ. ەكونوميكالىق ءوسۋدىڭ پرواكتيۆتى ساياساتى مەملەكەت باسشىسى قويعان ستراتەگيالىق مىندەتتەردىڭ ورىندالۋىن قامتاماسىز ەتە وتىرىپ، ەكونوميكانى يندۋستريالاندىرۋ مەن ءارتاراپتاندىرۋدىڭ نەگىزگى قۇرالىنا اينالادى»،- دەدى سەرىك جۇمانعارين.
