الەۋمەتتىك جەلىدە ءانشى ەربولات قۇدايبەرگەندى پوليتسيا قىزمەتكەرى ۇستاپ، ناركولوگيالىق ورتالىق الدىندا تۇرعان ۆيدەو تاراعان ەدى. پوليتسيا بۇل جاعدايعا تۇسىنىكتەمە بەردى، دەپ حابارلايدى «ادىرنا» ءتىلشىسى.
قالالىق پوليتسيا دەپارتامەنتى ەر ادامعا قاتىستى شاعىم كورشىلەرىنەن تۇسكەنىن مالىمدەدى.
«كوپقاباتتى تۇرعىن ۇيلەردىڭ ءبىرىنىڭ تۇرعىندارىنان ولاردىڭ كورشىسى اگرەسسيۆتى مىنەز كورسەتىپ، قوعامدىق ءتارتىپتى بۇزىپ جاتقانى تۋرالى ارىز ءتۇستى. ۋچاسكەلىك ينسپەكتور دەرەۋ وقيعا ورنىنا باردى. اقپارات راستالدى. ەر ادام ءوزىن ەرسى ۇستاپ، اگرەسسيا تانىتىپ، اينالاسىنداعىلاردىڭ تىنىشتىعىن بۇزعان»،-دەلىنگەن حابارلامادا.
كەيىن ەر ادام مەديتسينالىق تەكسەرۋگە جىبەرىلگەن. ساراپتاما ونىڭ پسيحواكتيۆتى زاتتاردىڭ اسەرىندە بولعانىن انىقتاعان.
«مەديتسينالىق كورسەتكىشتەردى ەسكەرە وتىرىپ جانە ىقتيمال قۇقىقبۇزۋشىلىقتاردىڭ الدىن الۋ ماقساتىندا ول 15 تاۋلىككە مامانداندىرىلعان مەديتسينالىق مەكەمەگە ورنالاستىرىلدى»، – دەپ مالىمدەدى پوليتسيا.
