اقش اسكەرى 21 اقپاندا يرانعا اسكەري سوققى جاساۋعا دايىن. الايدا ەل پرەزيدەنتى دونالد ترامپ ازىرگە تۇپكىلىكتى شەشىمىن قابىلداماعان. بۇل تۋرالى CBS News جازدى، دەپ حابارلايدى «ادىرنا» ءتىلشىسى.
ماتەريالدا اق ۇيدە «ديناميكالىق ءارى ۇزدىكسىز» تالقىلاۋلار ءجۇرىپ جاتقانى ايتىلعان. اكىمشىلىك ىقتيمال قاقتىعىستىڭ ۋشىعۋ قاۋپىن، سونداي-اق ساياسي جانە اسكەري سالدارىن سارالاپ وتىر.
«پەنتاگون تاياۋ شىعىستاعى اسكەري كونتينگەنتتىڭ ءبىر بولىگىن ۋاقىتشا باسقا ايماقتارعا، نەگىزىنەن ەۋروپاعا نەمەسە اقش-قا قايتا ورنالاستىرۋدا. بۇل اسكەري وپەراتسياعا دايىندىق بەلگىسى بولۋى مۇمكىن، بىراق ونىڭ مىندەتتى تۇردە جۇزەگە اساتىنىن بىلدىرمەيدى»،-دەيدى دەرەككوزدەردىڭ ءبىرى.
اق ءۇيدىڭ ءباسپاسوز حاتشىسى كەرولاين ليۆيتت يرانعا سوققى جاساۋدىڭ «كوپتەگەن سەبەبى مەن دالەلى بارىن» اتاپ ءوتتى. الايدا ول ترامپ ءۇشىن ديپلوماتيا ءاردايىم تاڭداۋلى جول بولىپ قالا بەرەتىنىن جەتكىزدى.
ليۆيتت سونداي-اق اقش اكىمشىلىگى ماۋسىم ايىندا يراننىڭ يادرولىق نىساندارىنا قارسى «وتە ءساتتى وپەراتسيا» جۇرگىزگەنىن ەسكە سالدى.
«يران ءۇشىن پرەزيدەنت ترامپ پەن ونىڭ اكىمشىلىگىمەن كەلىسىمگە كەلۋ وتە دۇرىس شەشىم بولار ەدى»، — دەدى ول.
2025 جىلدىڭ ماۋسىمىندا اقش ءيزرايلدىڭ اسكەري ناۋقانىنا قوسىلىپ، يراننىڭ نەگىزگى يادرولىق نىساندارىنا سوققى جاساعان بولاتىن. شابۋىل نىساندارى فوردو، ناتانز جانە يسفاحانداعى جەر استى كەشەندەرى بولدى. كەيىن تاراپتار اتىستى توقتاتۋ تۋرالى كەلىسىمگە كەلگەن.
ترامپ يراننىڭ ۋران بايىتۋ ينفراقۇرىلىمى تولىق جويىلعانىن ايتسا، تەگەران ايتارلىقتاي زاقىم بولماعانىن مالىمدەدى. بۇعان دەيىن Axios باسىلىمى ترامپ كەڭەسشىلەرىنىڭ بىرىنە سىلتەمە جاساپ، تىكەلەي قاقتىعىس الداعى اپتالاردا 90% ىقتيمالدىقپەن باستالۋى مۇمكىن ەكەنىن جازعان.
17 اقپاندا جەنەۆادا اقش پەن يران اراسىنداعى كەلىسسوزدەر راۋندى اياقتالدى. اقش ۆيتسە-پرەزيدەنتى دجەي دي ۆەنستىڭ ايتۋىنشا، ۆاشينگتون تەگەران ءۇشىن «قىزىل سىزىقتاردى» بەلگىلەدى — ەڭ باستىسى، يران يادرولىق قارۋعا قول جەتكىزبەۋى ءتيىس.
