AQŞ äskerı 21 aqpanda İranǧa äskeri soqqy jasauǧa daiyn. Alaida el prezidentı Donald Tramp äzırge tüpkılıktı şeşımın qabyldamaǧan. Būl turaly CBS News jazdy, dep habarlaidy «Adyrna» tılşısı.
Materialda Aq üide «dinamikalyq ärı üzdıksız» talqylaular jürıp jatqany aitylǧan. Äkımşılık yqtimal qaqtyǧystyŋ uşyǧu qaupın, sondai-aq saiasi jäne äskeri saldaryn saralap otyr.
«Pentagon Taiau Şyǧystaǧy äskeri kontingenttıŋ bır bölıgın uaqytşa basqa aimaqtarǧa, negızınen Europaǧa nemese AQŞ-qa qaita ornalastyruda. Būl äskeri operasiiaǧa daiyndyq belgısı boluy mümkın, bıraq onyŋ mındettı türde jüzege asatynyn bıldırmeidı»,-deidı derekközderdıŋ bırı.
Aq üidıŋ baspasöz hatşysy Kerolain Livitt İranǧa soqqy jasaudyŋ «köptegen sebebı men dälelı baryn» atap öttı. Alaida ol Tramp üşın diplomatiia ärdaiym taŋdauly jol bolyp qala beretının jetkızdı.
Livitt sondai-aq AQŞ äkımşılıgı mausym aiynda İrannyŋ iadrolyq nysandaryna qarsy «öte sättı operasiia» jürgızgenın eske saldy.
«İran üşın prezident Tramp pen onyŋ äkımşılıgımen kelısımge kelu öte dūrys şeşım bolar edı», — dedı ol.
2025 jyldyŋ mausymynda AQŞ İzraildıŋ äskeri nauqanyna qosylyp, İrannyŋ negızgı iadrolyq nysandaryna soqqy jasaǧan bolatyn. Şabuyl nysandary Fordo, Natanz jäne İsfahandaǧy jer asty keşenderı boldy. Keiın taraptar atysty toqtatu turaly kelısımge kelgen.
Tramp İrannyŋ uran baiytu infraqūrylymy tolyq joiylǧanyn aitsa, Tegeran aitarlyqtai zaqym bolmaǧanyn mälımdedı. Būǧan deiın Axios basylymy Tramp keŋesşılerınıŋ bırıne sılteme jasap, tıkelei qaqtyǧys aldaǧy aptalarda 90% yqtimaldyqpen bastaluy mümkın ekenın jazǧan.
17 aqpanda Jenevada AQŞ pen İran arasyndaǧy kelıssözder raundy aiaqtaldy. AQŞ vise-prezidentı Djei Di Venstıŋ aituynşa, Vaşington Tegeran üşın «qyzyl syzyqtardy» belgıledı — eŋ bastysy, İran iadrolyq qaruǧa qol jetkızbeuı tiıs.
