وزبەكستاننىڭ عارىشتىق زەرتتەۋلەر مەن تەحنولوگيالار اگەنتتىگى تاۋەلسىز ەل تاريحىنداعى العاشقى عارىشكەردى عارىشقا جىبەرۋ ءۇشىن جالپىۇلتتىق اشىق ىرىكتەۋ وتكىزۋدى جوسپارلاپ وتىر. بۇل تۋرالى Spot اگەنتتىگىنە بەرگەن سۇحباتىندا «وزبەككوسموس» ۆيتسە-ديرەكتورى مۇحيددين يبراگيموۆ ايتتى، دەپ حابارلايدى «ادىرنا» ءتىلشىسى.
عارىشكەردىڭ ۇشۋىن ەگجەي-تەگجەيلى زەرتتەۋ جۇمىسى 16 اقپاندا پرەزيدەنت شاۆكات ميرزيوەۆ قاتىسقان كەڭەستەن كەيىن باستالعان. مەملەكەت باسشىسى عارىشكەردى جىبەرۋ ماسەلەسى بويىنشا ارنايى مەملەكەتتىك كوميسسيا قۇرۋدى تاپسىرعان. كوميسسيا ۇمىتكەرلەردى ىرىكتەۋ، دايىنداۋ جانە ۇشۋدى ۇيىمداستىرۋمەن اينالىسادى. ىرىكتەۋ پروتسەسىندە دامىعان جانە دامۋشى ەلدەردىڭ تاجىريبەسى زەرتتەلگەن.
عارىشكەرلەرگە قويىلاتىن تالاپتار جوعارى بولادى. يبراگيموۆتىڭ ايتۋىنشا، دەنساۋلىق جاعدايى، فيزيولوگيالىق كورسەتكىشتەر، عىلىمي ءبىلىم دەڭگەيى جانە شەت تىلدەرىن مەڭگەرۋى قارالادى.
ء«بىز جالپىۇلتتىق ىرىكتەۋ وتكىزگىمىز كەلەدى»، – دەپ اتاپ ءوتتى ۆيتسە-ديرەكتور.
العاشقى وزبەك عارىشكەرى 10–14 كۇنگە سوزىلاتىن قىسقا مەرزىمدى ۇشۋعا دايىندالادى. ۇشۋ ناقتى عىلىمي باعدارلامانى ورىنداۋعا باعىتتالعان، ونىڭ باسىم باعىتتارى:
• مەديتسينا مەن بيولوگيا – قاشىقتان دياگنوستيكا، جەرگىلىكتى دارىلىك وسىمدىكتەردىڭ تيىمدىلىگىن زەرتتەۋ;
• وسىمدىك گەنەتيكاسى – قۇرعاقشىلىققا جانە تۇزعا ءتوزىمدى سورتتاردى سىناۋ، جابىق اگروبيوجۇيەلەردى مودەلدەۋ;
• ماتەريالتانۋ – ماتەريالدار، ماتا مەن تالشىقتاردى جىلۋدى جيناۋ جانە شىعارۋ تۇرعىسىنان سىناۋ.
ءبىرىنشى وزبەك عارىشكەرىن دايىنداۋ قانشا ۋاقىتقا سوزىلاتىنى ءالى انىقتالماعان.
سونىمەن قاتار وزبەكستاندا وزدەرىنىڭ عىلىمي جاساندى سپۋتنيگىن جاساۋ جۇمىستارى جۇرگىزىلۋدە، ونى ۇشىرۋ 2028 جىلعا جوسپارلانعان.
