وڭتۇستىك كورەيانىڭ ەكس-پرەزيدەنتى يۋن سوك يول ءومىر بويىنا تۇرمە جازاسىنا كەسىلدى، دەپ حابارلايدى «ادىرنا» ءتىلشىسى Korea Times-قا سىلتەمە جاساپ.
سوت ەلدىڭ بۇرىنعى باسشىسىن 2024 جىلدىڭ جەلتوقسان ايىنىڭ باسىندا اسكەري جاعداي ەنگىزۋ ءىسى بويىنشا كىنالى دەپ تانىدى. دەگەنمەن، ارنايى پروكۋروردىڭ ءولىم جازاسىن تاعايىنداۋ تالابىنا قاراماستان، سوت ءولىم جازاسىن شىعارۋدان باس تارتتى.
يۋن «كوتەرىلىس باسشىسى» دەپ تانىلدى. سوتتىڭ پىكىرىنشە، اسكەري جاعداي ەنگىزۋ پارلامەنتتىڭ وكىلەتتىگىن بۇزعان.
ءىستى قاراۋ كەزىندە ارنايى پروكۋرورلار يۋن سوك يول مەن جوعارى لاۋازىمدى شەنەۋنىكتەر كونستيتۋتسيالىق نەگىزسىز اسكەري جاعداي ەنگىزۋ ءۇشىن ايلا-قۋلىق جاساعان دەپ مالىمدەدى.
يۋن سوك يول — وڭتۇستىك كورەيانىڭ ءومىر بويىنا تۇرمە جازاسىنا كەسىلگەن ءبىرىنشى ەكس-پرەزيدەنتى ەمەس. 1990 جىلداردىڭ ورتاسىندا سوت چون دۋن حۆاندى ءولىم جازاسىنا كەسىپ، كەيىن ءومىر بويىنا تۇرمە جازاسىنا وزگەرتتى. الايدا 1997 جىلى ول بوساتىلدى. چون كۆاندجۋ كوتەرىلىسىن باسۋ، حالىق قارجىسىن ۇرلاۋ جانە اسكەري كوتەرىلىسكە قاتىسى بار دەپ ايىپتالعان ەدى.
