قازاقستان پرەزيدەنتى قاسىم-جومارت توقاەۆ وڭتۇستىك كورەياداعى ەلشىنى اۋىستىردى. جاڭا ەلشى بولىپ اسەت جەنىسۇلى يسەنالي تاعايىندالدى، دەپ حابارلايدى “ادىرنا”.
"اسەت جەڭىسۇلى يسەنالي قازاقستان رەسپۋبليكاسىنىڭ كورەيا رەسپۋبليكاسىنداعى توتەنشە جانە وكىلەتتى ەلشىسى لاۋازىمىنا تاعايىندالدى", – دەلىنگەن اقوردا حابارلاماسىندا.
تاعى ءبىر جارلىقپەن نۇرعالي ارىستانوۆ قازاقستاننىڭ وڭتۇستىك كورەياداعى ەلشىسى قىزمەتىنەن بوساتىلدى. ول بۇل قىزمەتتى 2023 جىلدان بەرى اتقارىپ كەلگەن.
سونىمەن قاتار، قازاقستان رەسپۋبليكاسىنىڭ تايلاند كورولدىگىندەگى توتەنشە جانە وكىلەتتى ەلشىسى، بۇۇ ازيا مەن تىنىق مۇحيتقا ارنالعان ەكونوميكالىق جانە الەۋمەتتىك كوميسسياسى (ەسكاتو) جانىنداعى قازاقستان رەسپۋبليكاسىنىڭ تۇراقتى وكىلى مارعۇلان باقىتۇلى بايمۇحان قازاقستان رەسپۋبليكاسىنىڭ ميانما وداعى رەسپۋبليكاسىنداعى توتەنشە جانە وكىلەتتى ەلشىسى قىزمەتىن قوسا اتقارۋشى بولىپ تاعايىندالدى.
مارعۇلان باقىتۇلى 1999 جىلدان باستاپ ديپلوماتيالىق قىزمەتتە. سىرتقى ىستەر مينيسترلىگىنىڭ ورتالىق اپپاراتىندا، قازاقستاننىڭ پولشاداعى ەلشىلىگىندە جۇمىس ىستەگەن. 2017–2019 جىلدارى قازاقستاننىڭ پولشاداعى ەلشىسى بولدى. 2019–2021 جىلدارى سىرتقى ىستەر ءمينيسترىنىڭ ورىنباسارى قىزمەتىن اتقاردى. 2021 جىلدىڭ ساۋىرىنەن باستاپ قازاقستاننىڭ بەلگياداعى ەلشىسى، ەو جانە ناتو جانىنداعى وكىلى بولدى. 2025 جىلدىڭ تامىزىنان بەرى تايلاندتاعى ەلشى ءارى ەسكاتو جانىنداعى تۇراقتى وكىل قىزمەتىن اتقارىپ كەلەدى.
2026 جىلدىڭ اقپانىندا قازاقستاننىڭ كەنياداعى ەلشىسى رۋانداعا قوسا اتقارۋشى ەلشى بولىپ تاعايىندالعان بولاتىن.
