نازارباەۆتىڭ ستاتۋسى جايلى نورمانى الىپ تاستاۋ — كونستيتۋتسيانى رەفورمالاۋ نەمەسە “ەكىنشى رەسپۋبليكانى” قۇرۋ ەمەس - شالقار نۇرسەيىت

6343
Adyrna.kz Telegram

بۇگىن پرەزيدەنت قاسىم-جومارت توقاەۆ 5 ماۋسىم كۇنى وتەتىن رەفەرەندۋم تۋرالى جارلىققا قول قويدى. سونداي-اق، پرەزيدەنت تاپسىرماسىمەن زاڭگەرلەر، ساياساتتانۋشىلار مەن ساراپشىلار ەنگەن ارنايى جۇمىس توبى بىرىگىپ كونستيتۋتسيالىق وزگەرىستەردىڭ جوباسىن قۇردى.  بۇل حالىقتىڭ كوكەيىندە جۇرگەندىكتەن، بىردەن قولداۋعا يە بولادى. بۇل جونىندە «ادىرنا» تىلشىلەرى» ساياساتكەر شالقار نۇرسەيىتپەن تىلدەسىپ، پىكىرىن ءبىلدى.

«پرەزيدەنتكە ابسوليۋت بيلىك بەرەتىن قازىرگى كونستيتۋتسيادان ن.نازارباەۆتىڭ ستاتۋسى جايلى نورمانى الىپ تاستاۋ — كونستيتۋتسيانى رەفورمالاۋ نەمەسە “ەكىنشى رەسپۋبليكانى” قۇرۋ ەمەس.  قازاقستانعا ءدال قازىر كەرەگى تەك “دەەلباسيزاتسيا” عانا ەمەس، اتقارۋشى بيلىكتىڭ/پرەزيدەنتتىڭ ساياسي كۇشىن كونستيتۋتسيا ارقىلى شەكتەۋ قاجەت.  الداعى رەفەرەندۋمدا ۇسىنىلاتىن وزگەرىستەردىڭ ىشىندە پرەزيدەنتتىڭ قۇزىرەتتەرىن شەكتەيتىن، پارلامەنتكە ءوز بيلىگىن قايتاراتىن، سوت بيلىگىن تاۋەلسىز ينستيتۋت رەتىندە قۇرۋدى كوزدەيتىن ءبىر دە ءبىر پۋنكت جوق»، - دەدى  ساياساتكەر.

ونىڭ ايتۋىنشا، باسشى اۋىسقانىمەن بيلىكتە تۇك وزگەرىس جوق.

«بىرىنشىدەن، ن.نازارباەۆتىڭ كەزىندەگىدەي ق.توقاەۆتىڭ كەزىندە دە ۇكىمەتتى پارلامەنت ەمەس، پرەزيدەنت قۇرادى. پرەزيدەنت قالاعان ۋاقىتىندا پرەمەر-مينيستر مەن مينيسترلەردى تايعايىنداپ، قىزمەتتەن الىپ تاستاي الادى. زاڭ شىعارۋ پروتسەسىندە پرەزيدەنتتىڭ باسىمدىعى ساقتالادى. ءماجىلىس پەن سەنات پرەزيدەنت اكىمشىلىگى قالاعان زاڭ جوباسىن قابىلدايتىن پالاتا بولىپ قالا بەرەدى.

ەكىنشىدەن، سوت بيلىگى اتقارۋشى بيلىككە/پرەزيدەنتكە تاۋەلدى بيلىكتىڭ تارماعى بولىپ قالا بەرمەك. ءتىپتى جاڭادان قۇرىلاتىن كونستيتۋتسيالىق سوتتىڭ 11 مۇشەسىنىڭ 4-ەۋىن پرەزيدەنت تاعايىندايدى (قالعانىن پرەزيدەنتكە تاۋەلدى ءماجىلىس پەن سەنات 3 مۇشەدەن تاعايىندايدى). كونستيتۋتسيالىق سوتتىڭ توراعاسى مەن ورىنباسارىن پرەزيدەنت تاعايىندايدى.

ۇشىنشىدەن، بيلىكتىڭ دەتسەنتراليزاتسياسى بولمايدى. پرەزيدەنتتىڭ اكىمدەردىڭ اكتىلەرىنىڭ كۇشىن جوياتىن قۇزىرەتىنەن باس تارتۋى ەشنارسەنى وزگەرتپەيدى. سەبەبى پرەزيدەنت اكىمدەردى قالاعان ۋاقىتىندا تاعايىنداپ، قىزمەتتەن الىپ تاستاي الادى. وبلىس، قالا اكىمدەرىن سايلاۋدى ەنگىزبەي، تاۋەلسىز ءماسليحاتتاردى قالىپتاستىرماي بيلىكتىڭ دەتسەنتراليزاتسياياسى جايلى ءسوز قوزعاۋ مۇمكىن ەمەس»، دەپ ءۇش پۋنكتقا ءبولىپ ءتۇسىندىرىپ بەردى شالقار نۇرسەيىت.

ساياساتكەر ءسوز سوڭىندا ءدال قازىر ەكسپەرتتەر، اكتيۆيستتەر مەن جۋرناليستەر ازاماتتاردىڭ نازارىن ن.نازارباەۆتىڭ ستاتۋسى جايلى نورمانى الىپ تاستاۋعا ەمەس، پرەزيدەنت ينستيتۋىنىڭ بيلىگىن شەكتەمەي جاڭا “ەلباسىلاردىڭ” پايدا بولۋىنا كەدەرگى كەلتىرە المايتىنىمىزعا اۋدارۋى ءتيىس ەكەنىن ايتتى.

         «ادىرنا» ۇلتتىق پورتالى

پىكىرلەر