"قازاقستان قىتاي تۋريستەرى ءۇشىن تارتىمدى باعىتتىڭ ءبىرى بولا الادى". قىتايمەن ۆيزاسىز رەجيم تۋرالى پرەزيدەنت پىكىرى

2567
Adyrna.kz Telegram

پرەزيدەنت قاسىم-جومارت توقاەۆ قىتايمەن ۆيزاسىز رەجيمگە قاتىستى پىكىر ءبىلدىردى. بۇل تۋرالى  اقوردا جازدى، دەپ حابارلايدى “ادىرنا” ۇلتتىق پورتالى.

17 مامىردا قاسىم-جومارت توقاەۆ مەملەكەتتىك ساپارمەن قىتاي حالىق رەپسۋبليكاسىنا باردى. بۇل تۋرالى قىتايدىڭ سيان قالاسىندا وتكەن "ورتالىق ازيا - قىتاي" فورۋمىندا ايتىلدى.

“قازاقستان قىتاي تۋريستەرى ءۇشىن تارتىمدى باعىتتىڭ ءبىرى بولا الادى. 30 كۇنگە دەيىن ۆيزاسىز ءجۇرۋ تۋرالى ۇكىمەتارالىق كەلىسىمگە قول قويىلدى. بۇل قادام ەلىمىزگە قىتايدان تۋريستەردىڭ كوپتەپ كەلۋىنە جول اشارى ءسوزسىز، - دەدى مەملەكەت باسشىسى قازاق-قىتاي دوڭگەلەك ۇستەلىندە”.

ول بۇگىندە جاڭا تۋريستىك باعىتتار اشىلىپ جاتقانىن اتاپ ءوتتى.

«قازىر قازاقستاننىڭ 13 قالاسىنا «اشىق اسپان» رەجيمى ەنگىزىلدى. سونداي-اق 80 مەملەكەتتىڭ ازاماتىنا ۆيزاسىز كەلۋگە رۇقسات بەرىلدى»، - دەدى قاسىم-جومارت توقاەۆ.

ونىڭ ايۋىنشا، قازىر «استانا» حالىقارالىق قارجى ورتالىعىندا 73 ەلدىڭ 1 800-دەن اسا كومپانياسى تىركەلگەن. ونىڭ وننان ءبىرى – قىتاي كومپانيالارى. بۇل – باسقا ەلدەرمەن سالىستىرعاندا ەڭ جاقسى كورسەتكىش.

«جالپى ەلىمىزدەگى ينۆەستيتسيالىق احۋال وتە جاقسى. Kazakh Invest ۇلتتىق كومپانياسى شەتەلدەن ينۆەستور شاقىرىپ، ولارعا «ءبىر تەرەزە» قاعيداتى بويىنشا كومەك كورسەتەدى. مەملەكەت باسىمدىق بەرىلگەن جوبالاردى بارىنشا قولداۋعا دايىن»، - دەدى پرەزيدەنت.

مەملەكەت باسشىسى قازاقستان قىتايدىڭ «ءبىر بەلدەۋ – ءبىر جول» باستاماسىن جۇزەگە اسىرۋ ىسىندە نەگىزگى سەرىكتەستىڭ ءبىرى ەكەنىن ايتتى. وسىلايشا، قحر باتىس ەۋرازيانىڭ اۋقىمدى نارىعىنا قازاقستان ارقىلى شىعا الادى.

«ءبىز سيان قالاسىنداعى قۇرعاق پورتتا قازاقستاننىڭ لوگيستيكا ورتالىعىن سالۋعا باسا ءمان بەرىپ وتىرمىز. ورتالىق ازياعا، ەۋروپاعا، تۇركيا مەن يرانعا كونتەينەر پويىزدارىن تىكەلەي جونەلتۋ بارىسىندا وسى ورتالىق نەگىزگى حاب بولادى.

ءبىز قىتايعا قاراي «اياگوز – باقتى» تەمىر جولىن ىسكە قوسۋدى جوسپارلاپ وتىرمىز. «دوستىق – مويىنتى» اراسىنداعى تەمىر جولعا كۇردەلى جوندەۋ جۇرگىزىلەدى. ناتيجەسىندە تەمىر جول ارقىلى جىل سايىن 20 ملن تونناعا دەيىن جۇك تاسىمالداۋعا مۇمكىندىك تۋادى»، - دەدى توقاەۆ.

ەۋروپا مەن ازيا اراسىنداعى ءترانزيتتى جانداندىرۋ ءۇشىن ترانسكاسپي باعدارىن دامىتۋ ماڭىزدى.

بۇل باعىتتىڭ بولاشاعى زور. ويتكەنى، قىتايدان ەۋروپاعا اپاراتىن توتە جول – وسى. ونىڭ ۇزىندىعى «سولتۇستىك دالىزدەن» 2,5 مىڭ شاقىرىمعا قىسقا.

قازاقستان ازەربايجان، گرۋزيا جانە تۇركيا ەلدەرىمەن بىرلەسىپ، بىرىڭعاي تاريف ساياساتىن قالىپتاستىرۋعا كىرىستى. سونىمەن قاتار ورتاق تسيفرلىق پلاتفورما جاسالادى. وسى ءدالىز ارقىلى جۇك تاسىمالداۋدىڭ باسقا دا ماسەلەلەرى شەشىمىن تابادى، - دەپ تۇيىندەدى ءسوزىن پرەزيدەنت.

ايتا كەتەيىك، 17 مامىردا قاسىم-جومارت توقاەۆ مەملەكەتتىك ساپارمەن قىتاي حالىق رەپسۋبليكاسىنا باردى. وڭتۇستىكتەگى كورشىمىزدىڭ سيان قالاسىنداعى «ورتالىق ازيا – قىتاي» فورۋمىنىڭ قارساڭىنداعى ساپاردىڭ العاشقى كۇنىندە-اق، ەكى ەل باسشىلارى بىرقاتار ماڭىزدى قۇجاتقا قول قويدى.

پىكىرلەر