"پالاۋ ورتالىعىندا" بولعان جارىلىستان قازا تاپقاندار سانى جەتىگە جەتتى، دەپ حابارلايدى "ادىرنا" ۇلتتىق پورتالى.
دەنساۋلىق ساقتاۋ باسقارماسىنىڭ مالىمەتىنشە، قايعىلى وقيعا كەزىندە قازا تاپقاندار سانى 7 ادامعا جەتكەن. ولاردىڭ بەسەۋى وقيعا ورنىندا كوز جۇمسا، تاعى ەكەۋى 26 اقپاندا جانساقتاۋ بولىمىندە قايتىس بولعان. قازا بولعانداردىڭ اراسىندا 16 جاستاعى قىز بار.
الدىن الا مالىمەت بويىنشا، 15 ادام اۋرۋحاناعا جاتقىزىلعان. قازىرگى ۋاقىتتا ستاتسيونارلىق ەم قابىلداپ جاتقان ناۋقاستار سانى – 13. تاعى 6 ادام دارىگەرلەر تەكسەرۋىنەن ءوتىپ، قاجەتتى كومەك العاننان كەيىن امبۋلاتورلىق ەمگە جىبەرىلگەن.
دارىگەرلەردىڭ ايتۋىنشا، زارداپ شەككەندەردىڭ باسىم بولىگى ءارتۇرلى دەڭگەيدەگى كۇيىك العان. ولاردىڭ جاعدايى مامانداردىڭ تۇراقتى باقىلاۋىندا.
وقيعا ورنىندا شۇعىل مەديتسينالىق كومەك كورسەتۋ ءۇشىن وبلىس ورتالىعىنان قوسىمشا مەديتسينا قىزمەتكەرلەرى تارتىلىپ، ءۇش انەستەزيولوگ-رەانيماتولوگ بريگاداسى جۇمىلدىرىلعان.
قازىرگى ۋاقىتتا جارىلىستىڭ سەبەپتەرى انىقتالىپ جاتىر. تەرگەۋ جۇمىستارى جالعاسۋدا.
