قازاقستاننىڭ باس پروكۋراتۋراسى «ەپشتەين فايلدارىنا» بايلانىستى تەكسەرىس جۇمىستارىن باستاعانىن ايتتى، دەپ حابارلايدى "ادىرنا" ۇلتتىق پورتالى.
بۇل تۋرالى باس پروكۋرور بەرىك اسىلوۆ پىكىر ءبىلدىردى.
25 اقپاندا ءماجىلىس وتىرىسىندا دەپۋتات اسحات راحىمجانوۆ باس پروكۋرور مەن ۇقك توراعاسىنىڭ اتىنا دەپۋتاتتىق ساۋال جولداپ، قازاقستاندىق جوعارى لاۋازىمدى تۇلعالاردىڭ امەريكالىق قارجىگەر دجەففري ەپشتەينمەن بايلانىسى بولۋى مۇمكىن دەگەن اقپاراتتى تەكسەرۋدى سۇراعان.
بەرىك اسىلوۆتىڭ سوزىنشە، قازىر جاريالانعان ماتەريالدار جان-جاقتى زەردەلەنىپ، ءتيىستى تەكسەرىس جۇمىستارى باستالىپ كەتكەن.
«بۇل – ماڭىزدى ماسەلە. دەپۋتاتتىق ساۋال جاڭا عانا جولداندى، الايدا اتالعان تاقىرىپ بۇكىل الەمدە قىزۋ تالقىلانىپ جاتىر. سوندىقتان قۇقىق قورعاۋ ورگاندارى بۇل فاكتىلەردىڭ راس-وتىرىگىن انىقتاۋ بويىنشا جۇمىس جۇرگىزۋدە»، – دەدى باس پروكۋرور.
سونداي-اق، ول دجەففري ەپشتەيننىڭ قازاقستان اۋماعىنا كەلگەن-كەلمەگەنى دە تەكسەرىلىپ جاتقانىن اتاپ ءوتتى.
