قازاقستان مۇناي ەكسپورتىن ءارتاراپتاندىرۋ ماقساتىندا باكۋ – تبيليسي – دجەيحان مۇناي قۇبىرى ارقىلى تاسىمال كولەمىن ارتتىرۋدى جوسپارلاپ وتىر، دەپ حابارلايدى "ادىرنا" ۇلتتىق پورتالى Reuters اگەنتتىگىنە سىلتەپ.
اگەنتتىك دەرەگىنشە، جەلتوقسان ايىندا قازاقستان باكۋ – تبيليسي – دجەيحان باعىتىمەن جەتكىزىلەتىن مۇناي كولەمىن ۇلعايتادى. بۇعان كاسپي قۇبىر كونسورتسيۋمىنداعى وتكىزۋ قابىلەتىنىڭ قىسقارۋى سەبەپ بولدى. بۇرىن نوۆوروسسيسك پورتى ماڭىنداعى تەڭىز تەرمينالىندا ءۇش ايلاق جۇمىس ىستەسە، شابۋىل سالدارىنان ءبىر ايلاق ىستەن شىعىپ، ەكىنشىسى جوندەۋگە جابىلعان. قازىر مۇنايدى تيەۋ تەك ءبىر عانا جۇمىس ىستەپ تۇرعان ايلاق ارقىلى جۇرگىزىلۋدە.
ايتا كەتەيىك، 29 قاراشا كۇنى تاڭعى ساعات 04:06-دا نوۆوروسسيسكىدەگى كقك تەڭىز تەرمينالى ۋكراينالىق ەكيپاجسىز كاتەرلەردىڭ شابۋىلىنا ۇشىراعان. سونىڭ سالدارىنان ايلاق قۇرىلعىلارى زاقىمدانىپ، مۇناي تيەۋ وپەراتسيالارى ۋاقىتشا تولىق توقتاتىلعان ەدى. وقىس وقيعا كەزىندە زارداپ شەككەندەر جوق. اپاتقا قارسى اۆتوماتتى جۇيەلەر دەر كەزىندە ىسكە قوسىلىپ، قاجەتتى قۇبىر جەلىلەرى جابىلدى. الدىن الا مالىمەت بويىنشا، تەڭىزگە مۇناي توگىلمەگەن.
سول كۇنى قازاقستان ەنەرگەتيكا مينيسترلىگى جاعدايدىڭ باقىلاۋدا ەكەنىن مالىمدەدى.
ۆيتسە-مينيستر ەرلان اقباروۆ 4 جەلتوقسان كۇنى سەنات وتىرىسىندا مۇناي تاسىمالى قازىرگى ۋاقىتتا تۇراقتى رەجيمدە جالعاسىپ جاتقانىن ايتتى.
«قازىر ءبىر ايلاق تولىق جۇمىس ىستەپ تۇر، ال ەكىنشى ايلاقتى ىسكە قوسۋ بويىنشا جوندەۋ جۇمىستارى جۇرگىزىلۋدە. مۇناي تاسىمالداۋعا قاتىستى ەشقانداي شەكتەۋ جوق»، – دەدى ەرلان اقباروۆ.
زالال كولەمى ازىرگە ناقتى ەسەپتەلمەگەن، ءتيىستى باعالاۋ جۇمىستارى جالعاسىپ جاتىر.
كاسپي قۇبىر كونسورتسيۋمى قازاقستانداعى تەڭىز، قاشاعان جانە قاراشىعاناق كەن ورىندارىنان مۇناي ەكسپورتتاۋدى قامتاماسىز ەتەدى. 2024 جىلى تەرمينال ارقىلى شامامەن 63 ملن توننا مۇناي جونەلتىلگەن، ونىڭ 74 پايىزعا جۋىعى شەتەلدىك جۇك جونەلتۋشىلەرگە تيەسىلى بولعان.
