1989 جىلى 28 اقپاندا انتيادرولىق «نەۆادا-سەمەي» قوزعالىسى قۇرىلدى. اۋەلدە سەمەي پوليگونىندا تاراعان گازعا قارسى ۇندەگەن قوزعالىس كەيىن حالىقارالىق سيپات الدى. قازاقستان يادرولىق قارۋدان ءوز ەركىمەن باس تارتقان سوڭ قوزعالىس ارەكەتى دە سايابىرسىدى. بىراق قوزعالىس سەمەي پوليگونى جابىلار الدىنداعى قارىمدى قادام بولدى.
قوزعالىستىڭ ماقساتى – حالىقتى يادرولىق سىناقتاردىڭ زاردابى تۋرالى حاباردار ەتۋ، سەمەي پوليگونىن جابۋ جانە سىناقتان زارداپ شەككەندەرگە كومەك كورسەتۋ بولدى.
قوزعالىسقا كارى-جاس دەمەي، حالىق ءبىر كىسىدەي جۇمىلىپ، بەلسەندى تۇردە قاتىستى. قاراعاندىنىڭ 130 مىڭ شاحتەرى مەرزىمى شەكتەۋسىز ەرەۋىلگە شىعاتىندارىن مالىمدەدى. ولاردى سەمەي، پاۆلودار، وسكەمەن، جەزقازعان جۇمىسشىلارى جانە جوعارعى كەڭەس قولدادى.
«نەۆادا-سەمەي» قوزعالىسىنىڭ ارقاسىندا 1991 جىلى تۇڭعىش پرەزيدەنت نۇرسۇلتان نازارباەۆتىڭ جارلىعىمەن سەمەي پوليگونى تولىق جابىلدى.
ال 29 تامىز حالىقارالىق يادرولىق قارۋعا قارسى كۇرەس كۇنى بولىپ بەكىتىلدى. قازاقستان يادرولىق قارۋدان تولىق باس تارتىپ، الەمدىك قوعامداستىقتا بەيبىتشىلىك سۇيگىش ەل رەتىندە تانىلدى.
