يراننىڭ قازاقستانداعى توتەنشە جانە وكىلەتتى ەلشىسى ءالي اكبار دجوۋكار اقش پرەزيدەنتى دونالد ترامپتىڭ يرانعا قارسى اسكەري ارەكەتتەردى باستاۋ تۋرالى شەشىمىنە پىكىر ءبىلدىردى، دەپ حابارلايدى «ادىرنا» ءتىلشىسى Sputnik قازاقستانعا سىلتەمە جاساپ.
ديپلوماتتىڭ سوزىنشە، قاقتىعىس ورشىگەنگە دەيىن تاراپتار بەلسەندى كەلىسسوز جۇرگىزگەن جانە يران امەريكالىق تاراپقا «قىزىق شەشۋ جولدارىن» ۇسىنعان.
«ترامپتىڭ… ونىڭ كەڭەسشىلەرى اقىماق. وعان سەنىمدىمىن. مەن سوعىس باستاۋعا ءماجبۇر ەتكەن ادامدار تۋرالى ايتىپ وتىرمىن. ارينە، اقش-تا تاجىريبەلى كەڭەسشىلەر بار، بىراق پرەزيدەنت ولاردى تىڭداعان جوق»،- دەدى دجوۋكار.
ول سونداي-اق تاجىريبەلى ساراپشىلار يران جاعدايىنىڭ باسقا قاقتىعىستاردان، مىسالى ۆەنەسۋەلادان ايىرماشىلىعىن ەسكەرىپ، يرانمەن مۇمكىن بولاتىن سوعىس ۇزاققا سوزىلۋى مۇمكىن ەكەنىن ەسكەرتكەنىن ايتتى.
ەلشى يرانداعى اسكەري ارەكەتتەر ناتيجەسىندە مىڭنان استام بەيبىت تۇرعىن، ونىڭ ىشىندە بالالار قازا تاۋىپ، مەكتەپتەر مەن اۋرۋحانالار زارداپ شەككەنىن اتاپ ءوتتى. ودان بولەك، ديپلومات قازىرگى تاڭدا تەگەران كەلىسسوزدەردى قايتا باستاۋعا نيەت بىلدىرمەيتىنىن مالىمدەدى.
«ترامپ يران كەلىسسوزگە دايىن دەدى، بىراق بۇل يراننىڭ ۇستانىمىنا سايكەس كەلمەيدى»،- دەدى ول.
ونىڭ سوزىنشە، جاعدايدىڭ ءارى قاراي دامۋى تەك تەگەران مەن ۆاشينگتون پوزيتسيالارىنا عانا ەمەس، سونداي-اق حالىقارالىق ۇيىمدار مەن جاھاندىق ساياساتتىڭ رولىنە دە بايلانىستى بولادى.
استانادا وتكەن بريفينگتە ءسوز سويلەگەن ەلشى قازاقستاندى «دوس ءارى باۋىرلاس ەل» دەپ اتادى. بىراق قازاقستان باسشىلىعىنىڭ يرانعا كوڭىل ايتپاۋىن وزىنشە تۇسىندىرۋگە تىرىستى. ول سوعىس ارەكەتى باستالعان مەزگىلگە مەڭزەپ، دەمالىس كۇندەرى بولعاندىقتان، قازاقستان بيلىگى كوڭىل ايتۋعا مۇمكىندىك تاپپاعان شىعار دەپ توپشىلادى.
ەلشى پارسى شىعاناعىنداعى مەملەكەتتەر اۋماعىنداعى اسكەري نىساندارعا جاسالعان شابۋىلدارعا دا توقتالدى. ونىڭ ايتۋىنشا، اسكەري ارەكەتتەر باستالار الدىندا يران رەسمي تۇردە ەسكەرتۋ جاساعان.
– پارسى شىعاناعىنداعى يران اتقىلاعان بازالار - اقش-قا تيەسىلى نىساندار. سوندىقتان ولار شابۋىل نىساناسىنا اينالدى. كەيبىر اراب ەلدەرى يراننىڭ وسى بازالارعا سوققى جاساعانىنا نارازىلىق بىلدىرۋدە. الايدا شابۋىل ءدال وسى بازالاردان باستالعاندىقتان، تەگەران قورعانىس ماقساتىندا جاۋاپ بەرۋگە ءماجبۇر بولدى، – دەدى ديپلومات.
