قوستانايدا «ايماقتاردىڭ ەكونوميكالىق دامۋى: سالالارارالىق ديالوگ» تاقىرىبىندا دوڭگەلەك ۇستەل ءوتتى. وعان بيلىك، بيزنەس جانە قارجى سەكتورلارىنىڭ وكىلدەرى قاتىسىپ، ايماقتىڭ دامۋ پەرسپەكتيۆالارىن جانە قازاقستان رەسپۋبليكاسىنىڭ جاڭا كونستيتۋتسياسى جوباسى بويىنشا جاقىندا وتەتىن رەسپۋبليكالىق رەفەرەندۋمدى تالقىلادى.
جيىنعا قوستاناي وبلىسىنىڭ اكىمى قۇمار اقساقالوۆ، وبلىستىق ءماسليحات توراعاسى جانە كونستيتۋتسيالىق كوميسسيا مۇشەسى سايلاۋبەك ەششانوۆ، «اتامەكەن» كاسىپكەرلەر پالاتاسىنىڭ وڭىرلىك ديرەكتورى رەنات داۆلەتپاەۆ، توو «زۋەۆكا» ديرەكتورى الەكساندر بورودين، وڭىردەگى ەۋرازيالىق بانك فيليالىنىڭ ديرەكتورى، وبلىستىق ءماسليحات دەپۋتاتى كىرمىزى جانبىرشينا جانە بيزنەس پەن اگرو سەكتور وكىلدەرى قاتىستى.
جيىندى اشقان وبلىس اكىمى قۇمار اقساقالوۆ الداعى رەفەرەندۋمنىڭ ماڭىزدىلىعىن اتاپ ءوتىپ، جاڭا كونستيتۋتسيانىڭ ادامعا باعىتتالعان نەگىزگى قاعيدالاردى بەكىتەتىنىن ايتتى.
«15 ناۋرىزدا جاڭا كونستيتۋتسيانى قابىلداۋ بويىنشا رەسپۋبليكالىق رەفەرەندۋم وتەدى. العاش رەت كونستيتۋتسيانىڭ العى سوزىندە نەگىزگى قۇندىلىقتار رەتىندە ادامعا قۇرمەت، جاۋاپكەرشىلىك جانە ادىلدىك كورسەتىلگەن. بۇل مەملەكەتتىك ساياساتتىڭ باستى باسىمدىعى – ادام، ونىڭ قۇقىقتارى مەن ءومىر ءسۇرۋ ساپاسى ەكەنىن ايقىندايدى»، – دەدى اكىم.
ونىڭ ايتۋىنشا، ەكونوميكانىڭ دامۋى ادامدار ءۇشىن جاعداي جاساۋعا — جۇمىس ورىندارى، لايىقتى تابىس، زاماناۋي ينفراقۇرىلىم جانە ساپالى ءبىلىم بەرۋ جۇيەسىن قامتاماسىز ەتۋگە تىكەلەي بايلانىستى.
قوستاناي وبلىسىندا قازىر 79 ينۆەستيتسيالىق جوبا جۇزەگە اسىرىلۋدا، ولاردىڭ جالپى سوماسى 2,4 ترلن تەڭگەنى قۇرايدى، ناتيجەسىندە 13 مىڭنان استام جۇمىس ورنى اشىلادى. تەك 2025 جىلى 12 يندۋستريالدى جوبا ىسكە قوسىلدى، ولاردىڭ جالپى سوماسى 337,3 ملرد تەڭگە. ۇلكەن جوبالاردىڭ قاتارىندا Kia زاۋىتى (131,5 ملرد تەڭگە) بار، مۇندا 1500 تۇراقتى جۇمىس ورنى قۇرىلدى. KamLitKZ كومپانياسى ءۇش ءىرى ماشينا جاساۋ جوباسىن ىسكە اسىرىپ، ايماقتا تاعى 1150 جاڭا جۇمىس ورنىن قامتاماسىز ەتتى.
سونىمەن قاتار اگروونەركاسىپ كەشەنى بەلسەندى دامۋدا. ايماقتا تەرەڭ وڭدەۋ جوباسى جۇزەگە اسىرىلۋدا، 7 زاماناۋي ءسۇت-تاۋارلىق كەشەن جۇمىس ىستەپ تۇر، بيىل تاعى 5 كەشەن اشىلۋى جوسپارلانعان.
كونستيتۋتسيالىق كوميسسيا مۇشەسى سايلاۋبەك ەششانوۆ جاڭا كونستيتۋتسيا جوباسىنىڭ باستى نورمالارىنىڭ ءبىرى – مەملەكەتتىك بيلىكتىڭ بىردەن-ءبىر دەرەككوزى جانە ەگەمەندىلىكتىڭ يەسى قازاقستان حالقى بولىپ تابىلاتىنىن اتاپ ءوتتى.
«اتامەكەن» پالاتاسىنىڭ وكىلى رەنات داۆلەتپاەۆ كونستيتۋتسيالىق وزگەرىستەردىڭ ىسكەرلىك قاۋىمداستىق ءۇشىن ماڭىزدى ەكەنىن، جەكە مەنشىكتى قورعاۋ، زاڭ ۇستەمدىگى جانە ءادىل باسەكەلەستىكتىڭ تۇراقتى ەكونوميكالىق دامۋدىڭ نەگىزى ەكەنىن جەتكىزدى.
دوڭگەلەك ۇستەلدىڭ قورىتىندىسى بويىنشا قاتىسۋشىلار جاڭا كونستيتۋتسيا جوباسىن ءبىر اۋىزدان قولداپ، قوستاناي وبلىسىنىڭ جانە ەلدىڭ تۇراقتى دامۋى ادىلدىك، جاۋاپكەرشىلىك جانە ادامنىڭ مۇددەسىن باسىمدىققا قويۋ پرينتسيپتەرىن نىعايتۋعا تىكەلەي بايلانىستى ەكەنىن اتاپ ءوتتى.
