15 ناۋرىز – بارشا قازاقستاندىقتار ءۇشىن ەرەكشە ەستە قالاتىن كۇن. سەبەبى، بۇگىن حالىق بولىپ جاڭا اتا زاڭىمىزدى قابىلداپ، قوعامنىڭ قالىپتاسۋى مەن دامۋىنا ىقپال ەتەتىن باستى قۇجاتىمىزدى زاڭداستىراتىن بولامىز.
قاراساي اۋدانىنىڭ جۇرتشىلىعى بۇل ساياسي ناۋقانعا ايرىقشا قولداۋ تانىتۋدا. سايلاۋ ۋچاسكەسىنە ەرتەمەن كەلىپ، ءوز تاڭداۋلارىن ءبىلدىرىپ جاتقانداردىڭ قاتارىندا «مەرەيلى وتباسى –2025» بايقاۋىنىڭ جەڭىمپازى – بەكدايىر اۋلەتى دە بار. رەسپۋبليكا بويىنشا جىل سايىن وتكىزىلىپ كەلە جاتقان بايقاۋعا وبلىس اتىنان قاتىسىپ، ءار ايماقتان ىرىكتەلىپ كەلگەن 20 ۇمىتكەردىڭ ىشىنەن وزا شىققان بۇل وتباسى قاندايدا بولسىن قۇرمەتكە لايىق.
ۇلتىمىزدىڭ كونە زاماننان بەرى جالعاسىپ كەلە جاتقان قولونەرىنىڭ قىر-سىرىن بىرنەشە بۋىننان بەرى ۇزبەي دامىتىپ ، اتا-بابامىزدان قالعان قۇدىلىقتارىمىزدى كەلەر ۇرپاققا جەتكىزگەن بۇل وتباسى – ونەردىڭ، ەڭبەكتىڭ جانە بەرەكەنىڭ جارقىن ۇلگىسى دەسە جاراسادى.
اۋلەت باسشىسى قوڭىر بەكدايىر كۇمىس اشەكەي جاساۋ ىسىمەن تانىلسا، جۇبايى انارگۇل ۇلتتىق كيىم تىگۋ ونەرىندە شەبەرلىگىمەن ەرەكشەلەنەدى.
بالالارى دا اتا جولىن جالعاپ، شىعارماشىلىق باعىتتى تاڭداعان. وسىلايشا ۇرپاق ساباقتاستىعىن، كونە مەن جاڭانى ۇشتاستىرا بىلگەن ولار ەلىمىزدەگى ساياسي ناۋقاندارعا دا بەلسەنە قاتىسىپ كەلەدى.
– اتا زاڭ – قوعامنىڭ دامۋىنا، ەلىمىزدە زاڭدىلىق پەن ءتارتىپتىڭ ۇستەمدىك قۇرۋىنا، جالپىادامزاتتىق قۇندىلىقتاردىڭ باعالانۋىنا جول اشاتىن نەگىزگى قۇجات. سوندىقتان ءبىز ەلىن قادىرلەيتىن ازامات رەتىندە مۇنداي شارالاردان تىسقارى قالا المايمىز. مىنە، سوندىقتان وتباسى مۇشەلەرى تۇگەلدەي سايلاۋ ۋچاسكەسىنە كەلىپ، ءوز تاڭداۋىمىزدى بىلدىردىك، – دەيدى قوڭىر بەكدايىر جۋرناليستارگە بەرگەن سۇحباتىندا.
ءبۇل كۇنى قاراساي اۋدانىنىڭ تۇرعىندارى اسا بەلسەندىلىك تانىتقانىن ايتا كەتۋ كەرەك. جاڭا كونستيتۋتسيانى قابىلداۋعا ارنالعان رەفەرەندۋمعا اعىلعان جۇرتشىلىقتىڭ قاتارى وسىنى اڭعارتادى.
