قوستاناي قالاسىندا جالپى اۋدانى 43,8 گەكتار بولاتىن ساياباق ايماعىن پايدالانۋعا بەرۋ جوسپارلانۋدا. جوبا مەملەكەت باسشىسىنىڭ ەكو-پاركتەر قۇرۋ جونىندەگى تاپسىرماسى اياسىندا جۇزەگە اسىرىلۋدا.
سونىمەن قاتار، وبلىس ورتالىعىنداعى ترياتلون پاركتە جاڭا كوپفۋنكتسيونالدى ستاديوننىڭ قۇرىلىسى جۇرگىزىلۋدە. بۇل قالاداعى ءىرى دەمالىس ايماقتارىنىڭ ءبىرىن قالىپتاستىرۋعا مۇمكىندىك بەرەدى. بۇگىن اتالعان سپورت كەشەنىنىڭ العاشقى كىرپىشىن قالاۋ ءراسىمى ءوتتى.
«تازا قازاقستان» رەسپۋبليكالىق ەكولوگيالىق اكتسياسى اياسىندا قوستاناي وبلىسىنىڭ اكىمى قۇمار اقساقالوۆقا ءوڭىردىڭ بىرقاتار اۋقىمدى جوبالارى تانىستىرىلدى.
قازىرگى ۋاقىتتا ورمان-ساياباق ايماعىنىڭ ەسكيزدىك جوباسى ازىرلەنىپ، كەلىسىلگەن. اۋماعىندا بەلسەندى دەمالىسقا ارنالعان ينفراقۇرىلىم قاراستىرىلعان: ۇزىندىعى 2,5 كم جۇگىرۋ جانە ۆەلوجول، فۋتبول جانە ۆولەيبول الاڭدارى، بالالار ويىن الاڭى، زاماناۋي ۆوركاۋت-ايماق. سونداي-اق «استانا» جاڭا شاعىن اۋدانى ارقىلى وتەتىن جەراستى وتكەلى كوزدەلگەن.
«ايماق تۇرعىندارى ءۇشىن دەمالىس ورىندارى كوپ بولۋى قاجەت. بيىل وڭىردە 77,3 مىڭ كوشەت وتىرعىزۋ جوسپارلانعان، جۇمىستار مامىر ايىندا بەلسەندى باستالادى. سونىمەن قاتار 37 كوپقاباتتى تۇرعىن ءۇيدىڭ قاسبەتتەرىن جوندەۋ، 31 بالالار الاڭىن سالۋ جانە ەسكى، اپاتتى ۇيلەردى بۇزۋ كوزدەلگەن»، – دەدى ءوڭىر باسشىسى.
سپورت سالاسىن دامىتۋ ماقساتىندا وبلىس ورتالىعىندا زاماناۋي كوپفۋنكتسيونالدى ستاديون سالۋ جوباسى ىسكە اسىرىلۋدا. نىساندا فۋتبول الاڭى، ۆولەيبول جانە باسكەتبول الاڭدارى، بەس جۇگىرۋ جولاعى، جەڭىل اتلەتيكالىق يادرو جانە سەكىرۋ ايماعى قاراستىرىلعان.
جوبانى ىسكە اسىرۋ بارلىق ساناتتاعى ازاماتتارعا سپورتپەن شۇعىلدانۋ مۇمكىندىگىن كەڭەيتىپ، قولايلى قالالىق ورتا قالىپتاستىرۋعا جانە قالانىڭ تارتىمدىلىعىن ارتتىرۋعا مۇمكىندىك بەرەدى.
«تازا قازاقستان» باعدارلاماسىن ىسكە اسىرۋ اياسىندا وبلىستا 2024 جىلدان بەرى 400-دەن استام قوعامدىق كەڭىستىك اباتتاندىرىلىپ، 250-دەن استام بالالار جانە سپورت الاڭى ورناتىلدى، 600-گە جۋىق زاڭسىز قوقىس ورنى جويىلدى، 1250-دەن استام قاراۋسىز ەسكى عيمارات بۇزىلدى، 277 مىڭنان استام اعاش پەن كوشەت وتىرعىزىلدى.
«2024 جىلى مەن كەز كەلگەن بوس اۋماقتاردا شاعىن ساياباقتار مەن سكۆەرلەر سالۋ جونىندە تاپسىرما بەرگەن ەدىم. وسى باعىتتا جۇيەلى جۇمىس جۇرگىزىپ جاتقان وڭىرلەر بار»، – دەدى قۇمار اقساقالوۆ.
سوڭعى ءۇش جىلدا وبلىس بويىنشا 94 پارك پەن سكۆەر سالىنىپ، اباتتاندىرىلدى، 420 بالالار مەن سپورت الاڭى ورناتىلدى. سونداي-اق 200-دەن استام كوپقاباتتى تۇرعىن ءۇيدىڭ قاسبەتى جوندەلدى.
«تازا قازاقستان» باعدارلاماسى اياسىندا 1000-نان استام ەسكى عيمارات بۇزىلىپ، 39 مىڭنان استام جارىق شام ورناتىلدى. كوشەنى جارىقتاندىرۋ دەڭگەيى 2023 جىلدان بەرى 82%-دان 94%-عا دەيىن ءوستى.
ەلدى مەكەندەردى كوگالداندىرۋ باعىتىندا دا وڭ جۇمىستار بايقالادى. ايماقتى كوگالداندىرۋ جوسپارىنا سايكەس 374 مىڭ جاسىل جەلەك وتىرعىزىلعان. 2025 جىلى 105,4 مىڭ كوشەت وتىرعىزۋ جوسپارلانسا، ءىس جۇزىندە 143,9 مىڭ كوشەت وتىرعىزىلدى، 136,5%-عا ورىندالعان.
