يران بيلىگى ورمۋز بۇعازىن جاپقانى تۋرالى تاراعان اقپاراتتى تاعى دا جوققا شىعاردى، دەپ حابارلايدى "ادىرنا" ۇلتتىق پورتالى سينحۋا اگەنتتىگىنە سىلتەپ.
يران يسلام رەۆوليۋتسياسى ساقشىلار كورپۋسىنىڭ جوعارى لاۋازىمدى وفيتسەرىنىڭ ايتۋىنشا، كەيبىر اقپارات قۇرالدارى يران ستراتەگيالىق ماڭىزى بار ورمۋز بۇعازىن تولىق جاپتى دەگەن مالىمەت تاراتقان. الايدا بۇل اقپارات شىندىققا سايكەس كەلمەيدى.
«كەيبىرەۋلەر ءبىزدى بۇعازدى جاپتى دەپ ايىپتاۋدا، بىراق ءىس جۇزىندە يران بۇل سۋ جولىن جاپقان جوق»، – دەدى وفيتسەر مەملەكەتتىك تەلەارناعا بەرگەن سۇحباتىندا.
ونىڭ ايتۋىنشا، يران بۇل ايماقتاعى تەڭىز قاتىناسىن حالىقارالىق ەرەجەلەرىنە سايكەس جۇزەگە اسىرادى.
يراننىڭ مەملەكەتتىك تەلەارناسى اسكەري دەرەككوزگە سىلتەمە جاساپ، ورمۋز بۇعازى اشىق ەكەنىن حابارلادى. دەگەنمەن اقش نەمەسە يزرايلگە تيەسىلى كەز كەلگەن كەمە اسكەري نىسانا رەتىندە قاراستىرىلۋى مۇمكىن ەكەنىن ەسكەرتتى.
سونىمەن قاتار يران سىرتقى ىستەر ءمينيسترىنىڭ ورىنباسارى سايد حاتيبزادە نيۋ-دەلي قالاسىندا وتكەن حالىقارالىق كونفەرەنتسيادا تەگەران بۇعازدى جاپپاعانىن جانە جاقىن ۋاقىتتا مۇنداي جوسپار جوق ەكەنىن مالىمدەدى.
«ەگەر يران بۇعازدى جابۋ تۋرالى شەشىم قابىلداسا، بۇل جونىندە رەسمي تۇردە حابارلايدى»، – دەدى ول.
