مەملەكەت باسشىسى قاسىم-جومارت توقاەۆ نازىك جاندىلار قاۋىمىن حالىقارالىق ايەلدەر كۇنىمەن قۇتتىقتادى. بۇل تۋرالى اقوردانىڭ ءباسپاسوز قىزمەتى جازدى، دەپ حابارلايدى "ادىرنا".
پرەزيدەنت قازاقستاننىڭ ايەلدەر قاۋىمىن كوكتەمدەگى اتاۋلى مەرەكەمەن شىن جۇرەكتەن قۇتتىقتاي وتىرىپ، وسى تاماشا مەيرام – بارشا نازىك جاندىلار قاۋىمىنا ارنالعان ەرەكشە سەزىم مەن زور قۇرمەتتىڭ جارقىن كورىنىسى ەكەنىن جەتكىزدى.
"ايەل – كوڭىلگە شاتتىق سىيلاپ، شابىتقا قانات بىتىرەتىن كوركەمدىك پەن سۇلۋلىقتىڭ سيمۆولى، جاسامپازدىق پەن جاڭاشىلدىقتىڭ قاينار كوزى. دۇنيەدەگى جاقسىلىق اتاۋلىنىڭ ءبارى ايەل زاتىنان باستاۋ الادى. ايەلدىڭ جانى نازىك بولسا دا، بولمىسى – مىقتى. ولار كەز كەلگەن قيىندىقتى ەڭسەرىپ، ءاردايىم دانالىق پەن دارالىقتىڭ، شىدامدىلىق پەن باتىلدىقتىڭ، سەنىمدىلىك پەن جاۋاپكەرشىلىكتىڭ وزىق ۇلگىسىن كورسەتىپ كەلەدى. ءاربىر ايەلدىڭ ومىرگە ءنار بەرەتىن، الەمگە جارىق سىيلايتىن، جوقتان بار جاسايتىن، ءتىپتى، جاۋلاسقاندى تاتۋلاستىرىپ، بەيبىتشىلىككە شاقىراتىن عاجاپ قاسيەتى بار. ايەل تابيعاتىنىڭ باستى قۇپياسى مەن سىرى دا – وسىندا", - دەدى قاسىم-جومارت توقاەۆ.
پرەزيدەنت "ايەل – ۇلتتىڭ جانى" دەسەك، ارتىق بولمايتىنىن ايتا كەلە، ولار بەرگەن ءتالىم-تاربيە ارقىلى ۇرپاقتىڭ دۇنيەتانىمى قالىپتاساتىنىن، جاستار ادەپتىلىك، وتانشىلدىق، ەڭبەكقورلىق، بىلىمپازدىق سىندى اسىل قاسيەتتەردى بويىنا سىڭىرەتىنىن باسا اتاپ ءوتتى.
"ۇلى دالانىڭ قايسار قىزدارى جايلى اڭىزعا بەرگىسىز اقيقات اڭگىمەلەر عاسىردان-عاسىرعا جالعاسىپ كەلەدى. قازاق ارۋلارىنىڭ پاراساتتىلىعى مەن باتىرلىعى جۇرتىمىزدىڭ جادىندا جاتتالىپ، تاريحىندا تاڭبالانىپ قالعان. وسى ساباقتاستىق قازىر دە ساقتالىپ وتىر. كوپتەگەن قىز-كەلىنشەكتەر وتانىمىزعا قالتقىسىز قىزمەت ەتىپ، مەكتەپتەر مەن ۋنيۆەرسيتەتتەردە، ەمحانالار مەن زەرتحانالاردا، مەملەكەتتىك مەكەمەلەر مەن قوعامدىق ۇيىمداردا، ونەر مەن بيزنەستە، ءوندىرىس ورىندارى مەن شارۋاشىلىقتاردا، اسكەري بولىمشەلەردە جانەەل ءومىرىنىڭ باسقا دا سالالارىندا ابىرويلى ەڭبەك ەتىپ ءجۇر", - دەيدى مەملەكەت باسشىسى.
قاسىم-جومارت توقاەۆ قازاقستان حالقىمىزدىڭ كەلەشەكتەگى تاعدىرىنا تىكەلەي ىقپال ەتەتىن اۋقىمدى جاڭعىرۋ جولىنا تۇسكەنىن دە ەسكە سالا كەتتى.
"جاڭا حالىق كونستيتۋتسياسى جوباسىنىڭ وزەگى – ەلىمىزدىڭ تاۋەلسىزدىگى، ەگەمەندىگى، اۋماقتىق تۇتاستىعى، ازاماتتاردىڭ مۇددەلەرى مەن قۇقىقتارى. رەفەرەندۋمعا شىعارىلعان جاڭا اتا زاڭنىڭ جوباسىندا انا مەن بالانى قورعاۋ، نەكە جانە وتباسى ينستيتۋتىن كۇشەيتۋ ماسەلەلەرىنە ايرىقشا نازار اۋدارىلدى. سونداي-اق حالىقتىڭ ءال-اۋقاتىن ارتتىرۋعا، قوعامدا زاڭدى قۇرمەتتەۋ، تابيعاتتى ايالاۋ، ادىلدىك، ەڭبەكقورلىق، جاۋاپتى جانە جاسامپاز وتانشىلدىق قاعيداتتارىن ورنىقتىرۋعا باسا ءمان بەرىلدى", - دەدى مەملەكەت باسشىسى.
پرەزيەنت ايەلدەر قاۋىمى بولاشاقتا دا وزدەرىنىڭ ادالدىعىمەن، قارىم-قابىلەتىمەن، ەرەكشە كۇش-جىگەرىمەن ادىلەتتى، وركەندەگەن قازاقستاندى قۇرۋعا بەلسەنە اتسالىسا بەرەتىندىگىنە كامىل سەنەتىنىن جەتكىزدى.
