انديجان قالاسىنىڭ تۇرعىنى ناسيباحون يبراگيموۆا الەۋمەتتىك جەلى قولدانۋشىلارىن ەرەكشە ۇيلەنۋ تويىنىڭ جاساۋىمەن تاڭعالدىردى. ول جاساۋىنا شامامەن 800 كىتاپ الىپ كەلىپ، ءداستۇرلى جاساۋدى كىتاپقا دەگەن سۇيىسپەنشىلىكتىڭ سيمۆولىنا اينالدىردى. بۇل تۋرالى kun.uz جازدى، دەپ حابارلايدى “ادىرنا”.
ونىڭ جۇبايى ميرجالول ماحمارايموۆتىڭ ايتۋىنشا، كىتاپتاردى ولار بىرنەشە جىل بويى بىرگە جيناعان. ەرلى-زايىپتىلار شامامەن ءۇش جىل كەزدەسكەن، سول ۋاقىت ىشىندە كىتاپ وقۋ ولاردىڭ ورتاق قىزىعۋشىلىعىنا اينالعان.
ء“بىز كىتاپتاردى بىرگە وقىدىق، بىرگە جينادىق جانە ساتىپ الدىق. سونىمەن قاتار كىتاپتاردى ونلاين ساتۋمەن دە اينالىستىق. ءبىزدىڭ ارمانىمىز – ءبىر ورتاق كىتاپ سورەسىنە يە بولۋ ەدى”، – دەيدى ول.
توي 2025 جىلدىڭ تامىز ايىندا وتكەن. توي الدىندا ناسيباحون كۇيەۋىنىڭ ۇيىنە وزىندە بولعان جانە ەكەۋى بىرگە جيناعان كىتاپتاردى الىپ كەلگەن. ۇيلەنۋ تويىنان كەيىن جۇبايلار ولاردى بىرىكتىرىپ، ءبىر ۇلكەن وتباسىلىق كىتاپحانا جاساعان.
قازىر ولاردىڭ وتباسىلىق كوللەكتسياسىندا شامامەن 1500 كىتاپ بار.
قازىرگى ۋاقىتتا ەرلى-زايىپتىلار تاشكەنت قالاسىندا تۇرادى. ميرجالول سول جەردە چورسۋ بازارىنداعى كىتاپ دۇكەندەرىنىڭ بىرىندە جۇمىس ىستەيدى.
ونىڭ ايتۋىنشا، كىتاپحانا سۋرەتى ينتەرنەتتە كەزدەيسوق تانىمال بولىپ كەتكەن. فوتو ناسيباحوننىڭ زۋلفيا اتىنداعى سىيلىققا قاتىسۋ ءۇشىن تاپسىرعان قۇجاتتارىنا تىركەلگەن ەدى. كەيىن ءبىر بلوگەر ونى جەلىدە جاريالاعان.
