قاراساي اۋدانىندا سپورت جانە ەسترادا جۇلدىزدارىنىڭ قاتىسۋىمەن ەرەكشە فۋتبول ماتچى ءوتتى. جاسىل الاڭدا ەل نامىسىن الەمدىك جارىستاردا قورعاپ جۇرگەن چەمپيوندار مەن دارىنىمەن دارالانعان ونەر يەلەرى باسەكەگە ءتۇستى. بۇعان دەيىن بولماعان ەرەكشە كەزدەسۋدى تاماشالاۋ ءۇشىن ستاديونعا 3000-نان استام جانكۇيەر جينالدى.
شارانىڭ باستى ماقساتى – كىمنىڭ مىقتى ەكەنىن انىقتاۋ ەمەس، كورەرمەنگە كوتەرىڭكى كوڭىل-كۇي، جارقىن ەموتسيا سىيلاۋ بولدى. ءىس-شارا ء«بىز جاڭا كونستيتۋتسيانى قولدايمىز» ۇرانىمەن «ادىلەتتى ءارى پروگرەسسيۆتى قازاقستاننىڭ حالىق كونستيتۋتسياسى ءۇشىن» وڭىرلىك جالپىۇلتتىق كواليتسيانىڭ قولداۋىمەن ۇيىمداستىرىلدى.
«كوماندالىق ويىندا دا، جالپى ومىردە دە جەڭىسكە تەك ەرىك-جىگەر مەن بىرلىك جەتەلەيدى. بۇل ماتچ – تەك سپورتتىق سايىس ەمەس، جاڭا كونستيتۋتسيا بويىنشا وتەتىن رەفەرەندۋمدى قولداۋعا باعىتتالعان يگى شارا»، – وڭىرلىك كواليتسيا باسشىسى قۋات بايعوجاەۆ.
فۋتبول الاڭىندا ەكى كوماندا باق سىناستى. «قوناەۆ» كومانداسىندا بالۋاندار - پاريج وليمپياداسىنىڭ جۇلدەگەرى دەمەۋ جادىراەۆ، بەيجىڭ وليمپياداسىنىڭ كۇمىس جۇلدەگەرى نۇرباقىت تەڭىزباەۆ، لوندون وليمپياداسىنىڭ قولا جۇلدەگەرى اقجۇرەك تاڭاتاروۆ، الەم چەمپيوناتىنىڭ جۇلدەگەرلەرى – نۇرجان جۇماجان، ەربول قوڭىراتوۆ، قورلان جاقانشا، ايتىسكەر اقىن سىرىم اۋەسحان، «Qonaev media» تەلارناسىنىڭ جۇرگىزۋشىسى قوسقانات كوپجاسار جانە وزگە دە تانىمال ازاماتتار ونەر كورسەتتى.
ال ولارعا قارسى «الاتاۋ» كومانداسى الاڭعا شىقتى. ونىڭ ساپىندا ەسترادا ءانشىسى جۇبانىش جەكسەن، «SuperStar KZ» جوباسىنىڭ جەڭىمپازى نۇرجان كەرمەنباەۆ، تانىمال كينواكتەر تاۋەكەل ءمۇسىلىم، بەلگىلى بلوگەر ازات ءجۇمادىل جانە باسقا دا ونەر يەلەرى بولدى.
ويىن تارتىستى ءارى قىزىقتى ءوتتى. قاتىسۋشىلاردىڭ جاقسى دايىندىقپەن كەلگەنى بايقالدى. ءاربىر شابۋىل مەن ادەمى گول جانكۇيەرلەردىڭ قىزۋ قولداۋىنا يە بولدى.
«فۋتبولدى بالا كەزىمنەن جاقسى كورەمىن. قازىر دە بۇل سپورت تۇرىمەن تۇراقتى اينالىسامىن. سپورت ادامدى سەرگەك ۇستاپ، فيزيكالىق فورماسىن ساقتاۋعا كومەكتەسەدى. مۇنداي ءىس-شارالار سالاۋاتتى ءومىر سالتىن ۇستانۋدىڭ جانە بەلسەندى ازاماتتىق ۇستانىمنىڭ قوعام ومىرىندەگى ماڭىزدىلىعىن تاعى ءبىر مارتە ايقىندايدى»، – دەدى اكتەر تاۋەكەل ءمۇسىلىم.
جارىس ناتيجەسىندە 2:1 ەسەبىمەن «قوناەۆ» كومانداسى جەڭىسكە جەتتى. ويىن سوڭىندا كورەرمەندەرگە كونتسەرتتىك باعدارلاما ۇسىنىلىپ، ستاديون مەرەكەلىك كوڭىل كۇيگە بولەندى.
