بۇگىن – قازاقستاننىڭ ءبىرىنشى جانە سوڭعى ۆيتسە-پرەزيدەنتى ەرىك اسانباەۆتىڭ تۋعانىنا 90 جىل.
قوستاناي وبلىسىنىڭ تۋماسى ەرىك ماعزۇمۇلى اسانباەۆ 1936 جىلى 10 ناۋرىزدا دۇنيەگە كەلگەن. ول قازاقستاننىڭ مەملەكەت قايراتكەرى، ديپلومات جانە ەكونوميكا عىلىمدارىنىڭ دوكتورى رەتىندە ەلىمىزدىڭ دامۋىنا ەلەۋلى ۇلەس قوسقان تۇلعا.
1959–1967 جىلدارى ەرىك اسانباەۆ قازۇۋ مەن ماسكەۋ قارجى ينستيتۋتىندا، قازاق كسر مەملەكەت جوسپارلاۋ كوميتەتىنىڭ عىلىمي-زەرتتەۋ ينستيتۋتىندا، سونداي-اق قازاق كسر قارجى مينيسترلىگى جۇيەسىندە ەڭبەك ەتتى.
تاۋەلسىزدىكتىڭ العاشقى جىلدارىندا، 1991 جىلدان باستاپ، ول قازاقستاننىڭ ۆيتسە-پرەزيدەنتى بولىپ تاعايىندالدى. 1994–1996 جىلدارى قر پرەزيدەنتى جانىنداعى ادام قۇقىقتارى جونىندەگى كوميسسيانىڭ توراعاسى قىزمەتىن اتقاردى. 1996 جىلى قىزمەتتىك وكىلەتتىگى توقتاتىلىپ، اقپاننان باستاپ 2000 جىلعا دەيىن گەرمانياداعى قازاقستاننىڭ توتەنشە جانە وكىلەتتى ەلشىسى بولدى. ەلشىلىك كەزىندە بەرليندە ابايعا كوشە اتىن بەرۋگە اتسالىسقان.
مەملەكەتتىك قىزمەتتەن تىس قالعاننان كەيىن ەرىك اسانباەۆ تۋرالى ساياساتكەرلەر دە پىكىر ءبىلدىرىپ، ءوز ەستەلىكتەرىمەن بولىسكەن. مىسالى، سەرىكبولسىن ءابدىلدين «ازاتتىققا» بەرگەن سۇحباتىندا:
«نازارباەۆقا قولىنان ءىس كەلەتىن ادامدار كەرەگى جوق. ال ۆيتسە-پرەزيدەنت اسانباەۆ ءوز پىكىرىن ايتۋعا باتىلى بار ادام ەدى. مۇنداي ادامعا قۇلاق اسپايتىن بولسا، قاۋىپ تۋعىزۋى مۇمكىن، سوندىقتان ونى شەتەلگە جىبەردى» – دەگەن.
ەرىك اسانباەۆ «وتان» وردەنىمەن ماراپاتتالعان. ول 68 جاسىندا، 2004 جىلدىڭ 23 تامىزىندا ومىردەن وزدى.
