فوتو: Shutterstock
12 ناۋرىزدان باستاپ الماتىداعى جول پوليتسياسىنىڭ اۆتوماتتى باقىلاۋ كامەرالارى قوسىمشا جول ەرەجەسىن بۇزۋ تۇرلەرىن تىركەۋگە كىرىسەدى، دەپ حابارلايدى "ادىرنا".
الماتى پد اكىمشىلىك پوليتسيا باسقارماسىنىڭ باستىعى سەرىك شۋماەۆءتىڭ ايتۋىنشا، بۇعان دەيىن اۆتوماتتى جۇيەلەر التى نەگىزگى قۇقىق بۇزۋشىلىقتى تىركەيتىن: جىلدامدىقتى اسىرۋ، قىزىل شامدا ءوتۋ، جول بەلگىلەرى مەن سىزىقتارىن ساقتاماۋ، دۇرىس توقتاماۋ نەمەسە تۇراقتاماۋ، العا شىعۋ ەرەجەسىن بۇزۋ جانە جاياۋ جۇرگىنشىلەرگە جول بەرمەۋ.
ەندى كامەرالار جاڭا مۇمكىندىكتەرگە يە بولادى. جۇيەلەر ءموبيلدى تەلەفوندى پايدالانۋدى، قاۋىپسىزدىك بەلدىگىن تاقپاي كولىك باسقارۋدى جانە قۇجاتتارعا بايلانىستى قۇقىق بۇزۋشىلىقتاردى، سونىڭ ىشىندە مىندەتتى ساقتاندىرۋدىڭ جوقتىعى نەمەسە تەحنيكالىق قاراۋدىڭ مەرزىمىنىڭ ءوتۋىن اۆتوماتتى تۇردە تىركەي الادى. كەيبىر جاعدايلاردا ەسكەرتۋ دە اۆتوماتتى تۇردە راسىمدەلەدى.
پوليتسيانىڭ حابارلاۋىنشا، جاڭا تەحنولوگيالاردى ەنگىزۋدىڭ باستى ماقساتى - پروفيلاكتيكالىق سيپاتتا بولىپ، جولداعى ءتارتىپتى ارتتىرۋ جانە الماتى تۇرعىندارى مەن قوناقتارىنىڭ قاۋىپسىزدىگىن قامتاماسىز ەتۋ.
