بەلارۋس رەسپۋبليكاسىنىڭ ىشكى ىستەر مينيسترلىگى جول ەرەجەسىن بۇزعان قازاقستاندىققا ەسكەرتۋ جاسادى، دەپ حابارلايدى “ادىرنا” ۇلتتىق پورتالى Tengri Auto-عا سىلتەپ.
مينسك قالاسىندا جول قوزعالىسى ەرەجەلەرىن بىرنەشە مارتە بۇزعان قازاقستان ازاماتىنا رەسمي ەسكەرتۋ جاسادى. ۆەدومستۆونىڭ مالىمەتىنشە، 32 جاستاعى ايەل بۇعان دەيىن دە اكىمشىلىك جاۋاپكەرشىلىككە تارتىلعان.
قازاقستاندىق ءنومىرلى Mercedes-Benz G-Class كولىگى الدىمەن مينسك قالاسىنىڭ تاريحي ورتالىعىنداعى تروتۋارعا قويىلعانى ءۇشىن سىنعا ۇشىراعان. كەيىن كولىكتىڭ ساۋدا ورتالىقتارىنىڭ بىرىندە مۇمكىندىگى شەكتەۋلى جاندارعا ارنالعان تۇراق ورنىنا زاڭسىز قويىلعانى انىقتالعان.
قۇقىق قورعاۋ ورگاندارى بەينەباقىلاۋ جازبالارىن زەرتتەۋ بارىسىندا تاعى ءبىر زاڭبۇزۋشىلىق دەرەگىن تىركەدى. اتاپ ايتقاندا، جۇرگىزۋشى ەكى جاسار بالانى ارنايى بالالار ورىندىعىنسىز الدىڭعى جولاۋشىلار ورنىندا تاسىمالداعان.
بەلارۋس ءىىم مالىمەتىنشە، شەتەلدىك ازاماتتىڭ ارەكەتتەرى ەل زاڭناماسىن بىرنەشە رەت بۇزۋ فاكتىلەرىن قامتيدى. وسىعان بايلانىستى ايەل ازاماتتىق جانە كوشى-قون بولىمشەسىنە شاقىرتىلىپ، قۇقىق بۇزۋشىلىقتار قايتالانعان جاعدايدا ەلدەن شىعارىلۋى مۇمكىن ەكەنى جونىندە رەسمي تۇردە ەسكەرتىلدى.
سونىمەن قاتار ۆەدومستۆو ونىڭ اسىراۋىندا ءتورت كامەلەتكە تولماعان بالاسى بارىن ەسكەرىپ، ازىرگە قاتاڭ شارا قولدانباۋعا شەشىم قابىلداعانىن حابارلادى .
