قازىر ەلىمىزدەگى تاكسي نارىعىن رەسەيلىك «ياندەكس تاكسي» كومپانياسى تۇتاستاي جاۋلاپ العان. سودان بولار، ەلىمىزدىڭ ۇلكەن قالالارىندا «ياندەكس تاكسيدىڭ» قىزمەتىن تۇتىناتىن، ونىڭ ءموبيلدى قوسىمشاسىن پايدالاناتىن ازاماتتار سانى از ەمەس. بۇگىنگى تاڭدا اتالعان ءموبيلدى قوسىمشا رەسەيدىڭ يمپەريالىق ساياساتىن ناسيحاتتاپ جاتقانى حالىقتى الاڭداتىپ وتىر؟
«وتكەن جولى ياندەكس تاكسي شاقىرتتىم. الماتى قالاسىنداعى التىنسارين كوشەسىنە بارۋىم كەرەك ەدى. ءموبيلدى قوسىمشا ارقىلى قازاقتىڭ باس ۇستازى التىنسارين اتىن تەرىپ ەدىم، «بىۆش. ۋليتسا پراۆدى» دەپ شىعا كەلدى. سوسىن ابىلاي حان كوشەسىنە بارماق بولعانىمدا، ياندەكس ول كوشەنىڭ بۇرىنعى «كوممۋنيستيچەسكايا» كوشەسى بولعانىن ەسىمە سالدى. ودان كەيىنگى ساپارىمدا ايتەكە بي كوشەسىن «بىۆش. وكتيابرسكايا ۋليتسا»، دوستىق داڭعىلىن «بىۆش. پروسپەكت لەنينا» دەپ كورسەتىپ بەردى» دەيدى ادىرنا ۇلتتىق پورتالىنا حات جازعان وقىرمان.
«قازاقستاننىڭ تاۋەلسىزدىك العانىنا وتىز ءۇش جىلدان اسىپ كەتتى. «ياندەكس تاكسي» سول ازات ەلدىڭ اۋماعىندا كاسىپ جاساپ جۇرگەندەرىن ۇمىتىپ، ۇرپاقتىڭ ساناسىنا كسرو كەزىندەگى اتاۋلاردى سىڭىرۋگە تىرىسۋى قانشالىقتى زاڭدى؟» دەگەن ساۋالىن دا جولداپتى.
ءبىز بۇل سۇراقتاردى بەلگىلى ساياساتتانۋشى دوس كوشىمگە قويعان ەدىك.
دوس كوشىم، ساياساتتانۋشى:
- «ياندەكس تاكسي» كومپانياسى قازاقستان اۋماعىندا كاسىپ جۇرگىزۋگە قۇقىلى شىعار. كومپانيانىڭ مۇنىڭ سىرتىندا كەڭەستىك اتاۋلاردى تىرىلتۋگە كۇش جۇمساپ جاتۋىن اقىماقتىقتىڭ شىڭى دەر ەدىم. سەبەبى، ەسكى اتاۋدى ءتىرىلتۋ، ونى ءار تۇتىنۋشىنىڭ ەسىنە سالۋ «ياندەكس تاكسيدىڭ» مىندەتىنە كىرمەيدى. حالقىمىز تاۋەلسىزدىكتەن كەيىنگى جىلدارى الماتىداعى ءار كوشەنى اتاۋىن وزگەرتۋگە از كۇش جۇمساعان جوق. مەنىڭشە، سونىڭ ءبارىن يدەولوگيالىق تۇرعىدا جوققا شىعارۋ مەملەكەتتىڭ ىشكى ىسىنە قول سۇعۋ بولىپ ەسەپتەلەدى. ول از بولسا، بۇل ۇلتتىڭ جانى جەرىن ۇستاپ، اشىق ارانداتۋعا بارۋ دەپ بىلەمىن. بۇل ماسەلەگە قالا باسشىلىعى عانا ەمەس، بارلىق اتقارۋشى بيلىك ورگاندارى، قوعام بولىپ قارسى تۇرۋ كەرەك.
سوڭعى جىلدارى رەسەي پرەزيدەنتى ۆ.ءپۋتيننىڭ ساياساتى بۇرىنعى كسرو-نى قايتا قۇرۋعا باعىتتالعانى بايقالادى. رەسەيلىك كومپانيانىڭ كەڭەستىك كەزەڭدەگى اتاۋلاردىڭ جوقشىسى بولا باستاۋى سول ساياساتتى اشىق قولداۋ ەمەس پە؟
ەندىگى قويىلار ساۋال وسى بولسا كەرەك.
قانات بىرلىكۇلى
ادىرنا ۇلتتىق پورتالى
