Qazir elimizdegi taksı naryǵyn reseılik «Iandeks Taksı» kompanııasy tutastaı jaýlap alǵan. Sodan bolar, elimizdiń úlken qalalarynda «Iandeks Taksıdiń» qyzmetin tutynatyn, onyń mobıldi qosymshasyn paıdalanatyn azamattar sany az emes. Búgingi tańda atalǵan mobıldi qosymsha Reseıdiń ımperııalyq saıasatyn nasıhattap jatqany halyqty alańdatyp otyr?
«Ótken joly Iandeks Taksı shaqyrttym. Almaty qalasyndaǵy Altynsarın kóshesine barýym kerek edi. Mobıldi qosymsha arqyly qazaqtyń bas ustazy Altynsarın atyn terip edim, «Byvsh. ýlıa Pravdy» dep shyǵa keldi. Sosyn Abylaı han kóshesine barmaq bolǵanymda, ıandeks ol kósheniń burynǵy «Kommýnıstıcheskaıa» kóshesi bolǵanyn esime saldy. Odan keıingi saparymda Áıteke bı kóshesin «Byvsh. Oktıabrskaıa ýlıa», Dostyq dańǵylyn «Byvsh. prospekt Lenına» dep kórsetip berdi» deıdi Adyrna ulttyq portalyna hat jazǵan oqyrman.
«Qazaqstannyń táýelsizdik alǵanyna otyz úsh jyldan asyp ketti. «Iandeks Taksı» sol azat eldiń aýmaǵynda kásip jasap júrgenderin umytyp, urpaqtyń sanasyna KSRO kezindegi ataýlardy sińirýge tyrysýy qanshalyqty zańdy?» degen saýalyn da joldapty.
Biz bul suraqtardy belgili saıasattanýshy Dos Kóshimge qoıǵan edik.
Dos Kóshim, saıasattanýshy:
- «Iandeks Taksı» kompanııasy Qazaqstan aýmaǵynda kásip júrgizýge quqyly shyǵar. Kompanııanyń munyń syrtynda keńestik ataýlardy tiriltýge kúsh jumsap jatýyn aqymaqtyqtyń shyńy der edim. Sebebi, eski ataýdy tiriltý, ony ár tutynýshynyń esine salý «Iandeks Taksıdiń» mindetine kirmeıdi. Halqymyz táýelsizdikten keıingi jyldary Almatydaǵy ár kósheni ataýyn ózgertýge az kúsh jumsaǵan joq. Menińshe, sonyń bárin ıdeologııalyq turǵyda joqqa shyǵarý memlekettiń ishki isine qol suǵý bolyp esepteledi. Ol az bolsa, bul ulttyń jany jerin ustap, ashyq arandatýǵa barý dep bilemin. Bul máselege qala basshylyǵy ǵana emes, barlyq atqarýshy bılik organdary, qoǵam bolyp qarsy turý kerek.
Sońǵy jyldary Reseı prezıdenti V.Pýtınniń saıasaty burynǵy KSRO-ny qaıta qurýǵa baǵyttalǵany baıqalady. Reseılik kompanııanyń keńestik kezeńdegi ataýlardyń joqshysy bola bastaýy sol saıasatty ashyq qoldaý emes pe?
Endigi qoıylar saýal osy bolsa kerek.
Qanat Birlikuly
Adyrna ulttyq portaly
