بۇۇ قاۋىپسىزدىك كەڭەسى يراننىڭ كورشى مەملەكەتتەرگە شابۋىلىن دەرەۋ توقتاتۋ تۋرالى قارار قابىلدادى. بۇل شەشىم 11 ناۋرىزدا 15 مۇشە ەلدىڭ 13 داۋىسىمەن قابىلداندى، دەپ حابارلايدى "ادىرنا" ۇلتتىق پورتالى DW سايتىنا سىلتەپ.
كەڭەس – حالىقارالىق قۇقىق پەن قاۋىپسىزدىكتى قامتاماسىز ەتۋگە جاۋاپتى نەگىزگى ورگان.
قارار ءماتىنىن پارسى شىعاناعى اراب مەملەكەتتەرى ىنتىماقتاستىعى ۇيىمىنىڭ مۇشەلەرى (بىرىككەن اراب امىرلىكتەرى، ساۋد ارابياسى، كۋۆەيت، ومان، قاتار، باحرەين) جانە يوردانيا ۇسىندى. قۇجاتتا يراننىڭ بۇل مەملەكەتتەرگە شابۋىلى حالىقارالىق قۇقىقتى بۇزۋ دەپ كورسەتىلىپ، «جاھاندىق بەيبىتشىلىك پەن قاۋىپسىزدىككە اۋىر قاۋىپ» رەتىندە باعالاندى. الايدا قۇجاتتا اقش پەن ءيزرايلدىڭ يرانعا قارسى اسكەري ارەكەتتەرى تۋرالى ەشتەڭە ايتىلماعان.
قاراردا يراننىڭ ورمۋز بۇعازىنداعى حالىقارالىق كەمە قاتىناسىن بوگەۋگە، كەدەرگى جاساۋعا نەمەسە بۇزۋعا باعىتتالعان ارەكەتتەرى مەن قاۋىپتەرى دە ايىپتالدى. ورمۋز بۇعازى – تاياۋ شىعىستان مۇناي ەكسپورتى ءۇشىن ماڭىزدى كولىك ارتەرياسى، ال يران اقش پەن ءيزرايلدىڭ يرانعا قارسى سوعىس باستالعاننان بەرى بۇعان كەدەرگى جاساپ وتىر.
قارارعا ەكى تۇراقتى مۇشە – رەسەي مەن قىتاي داۋىس بەرۋدەن باس تارتتى. رەسەيدىڭ بۇۇ-دەگى وكىلى ۆاسيلي نەبەنزيا قۇجاتتى «بىرجاقتى جانە الدىن الا شەشىم قابىلدانعان» دەپ سيپاتتاپ، ونىڭ ايماققا بەيبىتشىلىك اكەلۋگە قابىلەتسىز ەكەنىن ايتتى.
نەبەنزيانىڭ ايتۋىنشا، رەسەي قۇجات ءماتىنىن يرانعا قارسى سوققىنى ايىپتاۋ ارقىلى تولىقتىرۋدى ۇسىنعان، سونداي-اق رەسەي ءوز قارارىن ەنگىزۋگە تىرىسقان، بىراق اقش وعان ۆەتو قويعان.
يران تاراپىنان دا پارسى شىعاناعى ەلدەرىنىڭ قارارىن سىنعا الدى. ەل وكىلى امير سايد يراۆاني بۇل شەشىمدى «بۇۇ قاۋىپسىزدىك كەڭەسىنىڭ مانداتىن اقش پەن ءيزرايلدىڭ ساياسي ماقساتتارى ءۇشىن پايدالانۋ» دەپ اتادى. يران ءوزىن «اگرەسسيا قۇربانى» دەپ جاريالادى.
28 اقپاندا اقش پەن يزرايل يرانعا قارسى اسكەري وپەراتسيا باستاي وتىرىپ، اۋقىمدى اۆياتسيالىق سوققىلار جاسادى. ناتيجەسىندە يسلام رەسپۋبليكاسىنىڭ جوعارعى ليدەرى، اياتوللا ءالي حامەنەي جانە باسقا دا يران باسشىلارى قازا تاپتى.
وسىعان جاۋاپ رەتىندە يران يزرايل مەن پارسى شىعاناعى ەلدەرىنە سوققىلار جاساۋدا. سوڭعى شابۋىلدار كەزىندە بەيبىت نىساندارعا سناريادتار مەن بپلا سوققىلارى تۇسكەنى بىرنەشە رەت تىركەلدى.
يران پرەزيدەنتى ماسۋد پەزەشكيان كورشى مەملەكەتتەردەن كەشىرىم سۇراپ، شابۋىلداردىڭ يران اسكەري جەتەكشىلىگى جوق جاعدايدا جاسالعانىن مالىمدەدى. يراننىڭ يسلام رەۆوليۋتسياسى كورپۋسىنا قاراستى اسكەريلەر اقش-تىڭ كەز كەلگەن اسكەري بازالارىنا شابۋىل جاساۋدى جالعاستىراتىنىن ايتتى.
اقش پرەزيدەنتى دونالد ترامپ تاياۋ شىعىستاعى سوعىس «يران ونى توقتاتقىسى كەلگەنشە» اياقتالاتىنىن ايتتى. ءيزرايلدىڭ قورعانىس ءمينيسترى يسراەل كاتس سوعىستىڭ «ۋاقىت شەكتەۋسىز – قاجەت بولعانشا» جالعاساتىنىن اتاپ ءوتتى. ال يران سوعىستى اياقتاۋ شارتتارىن ءوز ەلى بەلگىلەيتىنىن مالىمدەدى.
