قىرعىزستان پرەزيدەنتى سادىر جاپاروۆ تاياۋ شىعىستاعى جاعدايعا قاتىستى مالىمدەمە جاساپ، ايماقتاعى شيەلەنىستىڭ كۇشەيۋىنە الاڭداۋشىلىق ءبىلدىردى. ول بۇل تۋرالى ءوزىنىڭ Facebook الەۋمەتتىك جەلىسىندەگى پاراقشاسىندا جازدى، دەپ حابارلايدى "ادىرنا".
پرەزيدەنتتىڭ ايتۋىنشا، تاياۋ شىعىستاعى شيەلەنىستىڭ ۋشىعۋى باۋىرلاس اراب ەلدەرىنە كەرى اسەرىن تيگىزىپ وتىر.
ء«بىزدى تاياۋ شىعىستاعى شيەلەنىستىڭ كۇشەيۋى جانە ونىڭ باۋىرلاس اراب مەملەكەتتەرىنە تەرىس اسەرى قاتتى الاڭداتادى. قاقتىعىستىڭ قاسيەتتى ورازا ايىندا ورىن الىپ جاتقانى ەرەكشە وكىنىشتى. بۇل – رۋحاني تازارۋ، قايىرىمدىلىق، كەشىرىم مەن ءوزارا قۇرمەت كەزەڭى»، – دەپ جازدى ول.
سادىر جاپاروۆ ايماقتاعى بەيبىت تۇرعىندار اراسىندا بولعان كوپتەگەن قۇرباندارعا بايلانىستى حالىقتاردىڭ قايعىسىنا ورتاقتاساتىنىن ايتتى.
ء«بىز بەيبىت تۇرعىندار اراسىنداعى كوپ قۇرباندارعا بايلانىستى ايماق حالىقتارىنىڭ ورنى تولماس قايعىسى مەن قاسىرەتىن بولىسەمىز. وسىنداي اپاتقا اكەلگەن كەز كەلگەن ارەكەتتى ايىپتايمىز»، – دەدى ول.
سونىمەن قاتار قىرعىزستان بۇۇ جارعىسى مەن حالىقارالىق قۇقىقتىڭ جالپىعا بىردەي تانىلعان قاعيداتتارىنا سايكەس ايماقتاعى جاعدايدى بەيبىت جولمەن رەتتەۋ ءۇشىن حالىقارالىق قاۋىمداستىقتىڭ كۇش بىرىكتىرۋىن قولدايتىنىن مالىمدەدى.
سونداي-اق تاراپتاردى سابىرلىق تانىتۋعا، اسكەري ارەكەتتەردى دەرەۋ توقتاتۋعا جانە جاعدايدى تەك بەيبىت جولمەن شەشۋ ءۇشىن كونسترۋكتيۆتى ديالوگقا قايتا ورالۋعا شاقىردى.
