Qyrǧyzstan prezidentı Sadyr Japarov Taiau Şyǧystaǧy jaǧdaiǧa qatysty mälımdeme jasap, aimaqtaǧy şielenıstıŋ küşeiuıne alaŋdauşylyq bıldırdı. Ol būl turaly özınıŋ Facebook äleumettık jelısındegı paraqşasynda jazdy, dep habarlaidy "Adyrna".
Prezidenttıŋ aituynşa, Taiau Şyǧystaǧy şielenıstıŋ uşyǧuy bauyrlas arab elderıne kerı äserın tigızıp otyr.
«Bızdı Taiau Şyǧystaǧy şielenıstıŋ küşeiuı jäne onyŋ bauyrlas arab memleketterıne terıs äserı qatty alaŋdatady. Qaqtyǧystyŋ qasiettı oraza aiynda oryn alyp jatqany erekşe ökınıştı. Būl – ruhani tazaru, qaiyrymdylyq, keşırım men özara qūrmet kezeŋı», – dep jazdy ol.
Sadyr Japarov aimaqtaǧy beibıt tūrǧyndar arasynda bolǧan köptegen qūrbandarǧa bailanysty halyqtardyŋ qaiǧysyna ortaqtasatynyn aitty.
«Bız beibıt tūrǧyndar arasyndaǧy köp qūrbandarǧa bailanysty aimaq halyqtarynyŋ orny tolmas qaiǧysy men qasıretın bölısemız. Osyndai apatqa äkelgen kez kelgen ärekettı aiyptaimyz», – dedı ol.
Sonymen qatar Qyrǧyzstan BŪŪ jarǧysy men halyqaralyq qūqyqtyŋ jalpyǧa bırdei tanylǧan qaǧidattaryna säikes aimaqtaǧy jaǧdaidy beibıt jolmen retteu üşın halyqaralyq qauymdastyqtyŋ küş bırıktıruın qoldaitynyn mälımdedı.
Sondai-aq taraptardy sabyrlyq tanytuǧa, äskeri äreketterdı dereu toqtatuǧa jäne jaǧdaidy tek beibıt jolmen şeşu üşın konstruktivtı dialogqa qaita oraluǧa şaqyrdy.
