بۇگىن «قايسار ارەنا» ستاديونىندا جاڭا كونستيتۋتسيانى قولداۋعا ارنالعان Open Air فورماتىنداعى شارا ءوتتى. وعان وبلىس اكىمى نۇرلىبەك نالىباەۆ، «AMANAT» پارتياسىنىڭ حاتشىسى ەرجان جىلقىباەۆ، پارلامەنت ءماجىلىسىنىڭ دەپۋتاتتارى مۇرات ەرگەشباەۆ، مارحابات جايىمبەتوۆ، مۇرات ابەنوۆ، ماقسات تولىقباي، نارتاي سارسەنعاليەۆ، «AMANAT» پارتياسى جانىنداعى «جاستار رۋحى» جاستار قاناتىنىڭ توراعاسى، جالپىۇلتتىق كواليتسيا مۇشەسى اقەركە يسكاندەروۆا قاتىستى.
ايماق باسشىسى مەملەكەت دامۋىنىڭ جاڭا باعىتىن ايقىنداۋداعى كونستيتۋتسيالىق رەفورمانىڭ ماڭىزىنا توقتالدى.
«پرەزيدەنتىمىز «حالىق كونستيتۋتسياسىنىڭ جوباسى ورتاق وتانىمىز – قازاقستان رەسپۋبليكاسىنىڭ جارقىن كەلەشەگىنە بەرىك ءارى مىزعىماس ىرگەتاس بولادى» دەپ اتاپ ءوتتى. جاڭا اتا زاڭىمىز تاۋەلسىزدىگىمىزدى، اۋماقتىق تۇتاستىعىمىزدى ساقتايدى. ازاماتتارىمىزدىڭ قۇقىقتارى مەن بوستاندىقتارىن قورعايدى. ەلىمىزدىڭ تىنىشتىعى مەن تۇراقتىلىعىن قامتاماسىز ەتەدى.
بۇل – الەمدەگى احۋال ۋشىعىپ تۇرعان ۋاقىتتا مەملەكەتتىگىمىزدى نىعايتاتىن ماڭىزدى قادام. تاۋەلسىزدىگىمىزدىڭ باستى نىشانى بولاتىن جاڭا قۇجاتتا ۇلى دالانىڭ مىڭجىلدىق تاريحي ساباقتاستىعى ساقتالعان. نەگىزگى يدەياسى رەتىندە ءبىلىم مەن عىلىم، مادەنيەت پەن يننوۆاتسيا انىقتالعان. ادىلەتتىلىك، زاڭ مەن ءتارتىپ قاعيداتتارى العاش رەت كونستيتۋتسيا دەڭگەيىندە بەكىتىلگەن، ءبىرتۇتاس قازاقستان حالقىنىڭ بارلىق ماقسات-مۇددەسى قامتىلعان.
سىندارلى ساتتە ەل بولىپ بىرىگۋدەن اسقان باقىت جوق. بارشاڭىزدى قازاقستاننىڭ جارقىن بولاشاعى ءۇشىن داۋىس بەرۋگە شاقىرامىن! ەلىمىز امان، حالقىمىز تىنىش، تاۋەلسىزدىگىمىز ماڭگى بولعاي!» – دەدى نۇرلىبەك نالىباەۆ.
جيىندا ءماجىلىس دەپۋتاتتارى مۇرات ابەنوۆ، نارتاي سارسەنعاليەۆ، ماقسات تولىقباي، «جاستار رۋحى» جاستار قاناتىنىڭ توراعاسى اقەركە يسكاندەروۆا، قورقىت اتا ۋنيۆەرسيتەتىنىڭ رەكتورى ناۋرىزباي بايقاداموۆ، «اناعا تاعزىم» ورتالىعىنىڭ ديرەكتورى التىناي مولجانوۆا، ايتىسكەر اقىن، ءۇش دۇركىن «التىن دومبىرا» يەگەرى مۇحتار نيازوۆ ءسوز سويلەدى.
ساحنا تورىندە ەسترادا جۇلدىزدارى ءمادينا سادۋاقاسوۆا، قايرات نۇرتاس، ميراس جۇگىنىسوۆ ونەر كورسەتتى.
«قايسار ارەناعا» جينالعان جۇرتشىلىق تەك قانا كونتسەرت تاماشالاعان جوق، ەلدىڭ ەرتەڭى تۋرالى وي ءبولىستى. ءوز تاڭداۋىن جاساۋدىڭ، ەل بولاشاعىنا ۇلەس قوسۋدىڭ ماڭىزىن ۇعىندى.
رەفەرەندۋم – دەموكراتيالىق قوعامنىڭ ەڭ باستى تەتىكتەرىنىڭ ءبىرى. سوندىقتان شەشىم حالىق تاڭداۋىنا سۇيەنىپ قابىلدانادى. بۇگىنگى كەش جاۋاپكەرشىلىكتى سەزىنەتىن بەلسەندى جاستاردىڭ، ەل بولاشاعىنا بەيجاي قارامايتىن ازاماتتاردىڭ باسىن قوسقان ەرەكشە كەزدەسۋ بولدى.
