تۇركيا اۋماعىندا يراننان ۇشقان تاعى ءبىر بالليستيكالىق زىمىران اتىپ ءتۇسىرىلدى. بۇل تۋرالى 13 ناۋرىزدا ەلدىڭ قورعانىس مينيسترلىگى جازدى، دەپ حابارلايدى «ادىرنا» ءتىلشىسى «انادولۋ» اگەنتتىگىنە سىلتەمە جاساپ.
«يراننان ۇشىرىلىپ، تۇركيانىڭ اۋە كەڭىستىگىنە كىرگەن بالليستيكالىق سنارياد شىعىس جەرورتا تەڭىزىندە ورنالاستىرىلعان ناتو-نىڭ اۋە شابۋىلىنا قارسى قورعانىس جانە زىمىرانعا قارسى قورعانىس بولىمشەلەرى تاراپىنان زالالسىزداندىرىلدى»، — دەلىنگەن حابارلامادا.
ۆەدومستۆو ەل اۋماعى مەن اۋە كەڭىستىگىنە باعىتتالعان كەز كەلگەن قاۋىپكە قارسى بارلىق قاجەتتى شارا باتىل ءارى كىدىرىسسىز قابىلداناتىنىن اتاپ ءوتتى.
قازىرگى تاڭدا وقيعانىڭ بارلىق ءمان-جايىن انىقتاۋ ءۇشىن ءتيىستى ەلمەن بايلانىستار جۇرگىزىلىپ جاتىر.
«وڭىردەگى بارلىق وقيعالار مۇقيات باقىلاۋدا جانە باعالانۋدا، بۇل رەتتە ەلىمىزدىڭ ۇلتتىق قاۋىپسىزدىگىنە باسىمدىق بەرىلەدى»، — دەپ مالىمدەدى ەلدىڭ قورعانىس مينيسترلىگى.
تۇركيالىق Savunma sanayi پورتالىنىڭ جازۋىنشا، زالالسىزداندىرىلعان بالليستيكالىق زىمىران ادانا قالاسىنداعى يندجيرليك اۋە بازاسىنا باعىتتالعان.
ايتا كەتەيىك، بۇل — تۇركيا اۋماعىندا اتىپ تۇسىرىلگەن ءۇشىنشى يراندىق زىمىران. بۇعان دەيىن ەلدىڭ قورعانىس مينيسترلىگى 4 جانە 9 ناۋرىزدا يراننان ۇشىرىلعان ەكى بالليستيكالىق زىمىراننىڭ جويىلعانىن حابارلاعان بولاتىن.
