يران سىرتقى ىستەر ءمينيسترىنىڭ ورىنباسارى كازەم گاريبابادي اقش-پەن كەلىسىمگە قول جەتكىزىلگەنىن راستاپ، ءوزارا تۇسىنىستىك جونىندەگى مەموراندۋم 19 ماۋسىمدا شۆەيتساريادا قول قويىلاتىنىن ايتتى. بۇل تۋرالى Tasnim اگەنتتىگى جازدى، دەپ حابارلايدى «ادىرنا» ءتىلشىسى.
ء«وزارا تۇسىنىستىك جونىندەگى مەموراندۋمنىڭ ءماتىنى اياقتالدى. وعان رەسمي قول قويۋ ءراسىمى جۇما كۇنى شۆەيتساريادا وتەدى. ەكى دەلەگاتسيا باسشىسى ءوزارا ءىس-قيمىلدىڭ كەلەسى ءتارتىبىن ايقىنداۋ ءۇشىن كەلىسسوزدەر جۇرگىزەدى. وسى ۋاقىتقا دەيىن امەريكالىق تاراپتىڭ سوعىستى توقتاتۋ، بلوكادانى الۋ جانە بۇعاتتالعان اكتيۆتەردى بوساتۋ جونىندەگى مىندەتتەمەلەرى تەكسەرىلەدى. الپىس كۇندىك كەلىسسوز پروتسەسى اقش وسى مىندەتتەمەلەردى ورىنداۋىنا بايلانىستى بولادى»، – دەدى گاريبابادي.
ونىڭ ايتۋىنشا، كەلىسىمگە قول قويىلعاننان كەيىنگى 60 كۇن ىشىندە تاراپتار سانكتسيالار، يادرولىق باعدارلاما جانە ەكونوميكالىق دامۋ تەتىكتەرى سياقتى ماسەلەلەردى تالقىلايدى.
گاريبابادي سونداي-اق كەلىسىم ليۆانعا دا قاتىستى ەكەنىن اتاپ ءوتتى.
«بۇگىن كەشكە ءارتۇرلى مايدانداردا، سونىڭ ىشىندە ليۆاندا دا سوعىس قيمىلدارىنىڭ دەرەۋ جانە تۇراقتى تۇردە توقتاتىلاتىنى جاريالانادى»، – دەدى ول.
يران شەنەۋنىگى كەلىسىم ماتىنىندە يراننىڭ بارلىق نەگىزگى ۇستانىمى كورىنىس تاپقانىن، ال قۇجات 19 ماۋسىمداعى قول قويۋ راسىمىنە دەيىن جاريالاناتىنىن ايتتى. ونىڭ سوزىنشە، ءيزرايلدىڭ ليۆانعا جاساعان شابۋىلىنان كەيىن يران قارۋلى كۇشتەرى جاۋاپ قايتارۋعا دايىندالعان. بۇل ۇستانىم، گاريباباديدىڭ ايتۋىنشا، اقش پرەزيدەنتى دونالد ترامپتىڭ يزرايلگە قاتىستى نەعۇرلىم قاتاڭ پوزيتسيا ۇستانۋىنا ىقپال ەتىپ، كەلىسىمنىڭ كەيبىر تارماعىن ىلگەرىلەتۋگە مۇمكىندىك بەرگەن.
سونىمەن قاتار ول قول جەتكىزىلگەن كەلىسىمگە قاراماستان، يران قارۋلى كۇشتەرى «ارقاشان قارسىلاستىڭ جوسپارلارىنا قارسى تۇرۋعا دايىن» ەكەنىن اتاپ ءوتتى.
ەسكە سالايىق، بۇعان دەيىن اقش پەن يراننىڭ 19 ماۋسىم كۇنى شۆەيتساريادا بەيبىت كەلىسىمگە قول قوياتىنىن جازعان ەدىك.
