ۆاشينگتوندا جەرلەنگەن قازاقتىڭ جازۋشىسى مۇحتار ماعاۋيننىڭ قابىرىنە ارنايى زيارات جاسالىپ،تۋعان جەرىنىڭ توپىراعى جەتكىزىلىپ، قۇران باعىشتالدى، دەپ حابارلايدى "ادىرنا" ۇلتتىق پورتالى.
جازۋشىنىڭ ۇلى ەدىگە ماعاۋين قازاقستانداعى اتا-بابالارى جەرلەنگەن اباي وبلىسى، شۇبارتاۋ اۋدانىنداعى بوساعا ولكەسىنەن اپارىلعان توپىراق پەن جۋساندى ىرىمداپ، اكەسىنىڭ قابىرىنە قويدى.
زيارات راسىمىنە ۆاشينگتونداعى Kazakh American Association مۇشەلەرى قاتىستى.
زياراتتان كەيىن ەدىگە ماعاۋيننىڭ ۇيىندە ەسكە الۋ جيىنى ءوتىپ، قۇران وقىلدى. جازۋشىنىڭ كابينەتى مەن كىتاپحاناسى ءالى دە سول قالپىندا ساقتالعان. تۇرعان ءۇيىن مۇراجايعا اينالدىرۋ جۇمىستارى جۇرگىزىلۋدە. جيىندا اتامىزدىڭ ءومىرى مەن شىعارماشىلىعى جايلى ەستەلىكتەر ايتىلدى.
اڭگىمە بارىسىندا مۇحتار ماعاۋيننىڭ 2022 جىلى سىرقاتتانىپ جاتىپ، «جازىپ جاتقان كىتابىمدى اياقتاۋعا ءۇش جىل ءومىر بەرشى» دەپ دۇعا ەتكەنى، اقىرىندا ەڭبەگىن 2024 جىلدىڭ كۇزىندە اياقتاپ، 2025 جىلدىڭ قاڭتارىندا، 85 جاسقا تولۋىنا ءبىر اي قالعاندا ومىردەن وتكەنى ەسكە الىندى.
بۇعان دەيىن ماعاۋيننىڭ اقش-تاعى قابىرىنەن الىنعان ءبىر ۋىس توپىراق قازاقستانعا جەتكىزىلىپ، بابالارىنىڭ قاسىنا قويىلعان بولاتىن.
